Псіхатэрапеўтка: У Лукашэнкі экспансіўная параноя

Яна сфармавалася ў дыктатара яшчэ ў дзяцінстве.

Псіхалагіня і псіхатэрапеўтка з практыкай Алена Шаршнёва на сваім ютуб-канале расказала пра псіхічныя праблемы беларускага дыктатара і прычыны іх узнікнення:

– Лукашэнка мае відавочныя прыкметы экспансіўнай параноі. Ён бачыць небяспеку на кожным кроку, падазрае навакольных у тым, што яны хочуць яму нашкодзіць. Калі падчас эпідэміі каранавірусу Лукашэнка захварэў, то нават у гэтым ён убачыў інтрыгі ворагаў. І ў адным з інтэрв'ю заявіў, што вірус яму "падкінулі". А чаго вартая ягоная знакамітая размова, "адкуль на Беларусь рыхтаваўся напад"!

Паранаідальныя парушэнні, як правіла, фармуюцца яшчэ ў дзяцінстве, калі дзіця не пачуваецца ў бяспецы. Аляксандра выхоўвала маці, якая, мяркуючы з ягоных інтэрв'ю, цвёрда карала яго, верагодна, ужывала фізічную сілу. Не дзіўна, што ў Аляксандра было фрустраванае запатрабаванне ў базавай бяспецы. Параноя Лукашэнкі выяўляецца таксама ягонай схільнасцю да падману. Ён не раз агучваў факты, якія адмаўлялі адзін аднаго ці былі проста нелагічнымі. Напрыклад, сказаў, што ягоны бацька загінуў у Вялікую Айчынную вайну. Пры тым што вайна скончылася ў 1945 годзе, а ён сам нарадзіўся ў 1954 годзе.

На шчасце, паранаідальны разлад паддаецца лекаванню, хоць і патрабуе сур'ёзнай тэрапіі.