Жыхарам вёскі ў Горацкім раёне даводзіцца на руках насіць памерлых на могілкі

Дарога да іх знікла.

У вёсцы Шалаханаўка Паршынскага сельскага савета, што ў Горацкім раёне Магілёўскай вобласці, перааралі дарогу на могілкі, і цяпер патрапіць туды практычна немагчыма. Людзі скардзяцца, што памерлых даводзіцца несці да месца пахавання па бездаражы на руках. Пра гэтую сітуацыю напісаў партал horki.info.

Паводле словаў мясцовых жыхароў, адлегласць ад вёскі да могілак – прыкладна кіламетр. У ранейшыя часы дабрацца туды было няцяжка: добра ўкатаная грунтавая дарога была параўнальна чыстай не толькі ўлетку, але і ў восеньска-вясновую бездараж. Але ў апошні час сітуацыя змянілася.

– Дарогу нашу сталі пераворваць. І з тых часоў могілкі сталі для нас практычна недаступнымі. Ні праехаць, ні прайсці туды не атрымоўваецца, можна ногі пераламаць. Вось прыклад: у лістападзе летась у мяне памерла мама, мы ледзь змаглі даставіць труну да магілы. Добра, што было сухое надвор'е! А вось памянуць на могілках праз дзевяць дзён мы яе ўжо не змаглі – зямля намокла, і мы туды не змаглі прабрацца, – расказала жыхарка вёскі Ірына Аляксандраўна.

Жанчына дадала, што, калі памерла яе цётачка, працоўныя «Камунальніка» былі вымушаныя несці труну на руках.

Каб даглядаць магілы блізкіх, людзі спрабавалі трапіць на могілкі з боку суседняй Макараўкі – даводзілася рабіць вялікі крук. Акрамя таго, доступ да могілак абцяжараны праз трубу, якая шмат гадоў адводзіла ручай за вёскай, але ў выніку перастала спраўляцца з гэтай функцыяй. Цяпер у нізіне стаіць вада, і на могілкі можна паспрабаваць праехаць толькі на пазадарожніку.