Беларусаў сталі арганізавана вазіць па шэнген у гішпанскі візавы цэнтр у Маскве
6- 25.05.2022, 11:40
- 10,428
Як правіла, віза робіцца за пяць працоўных дзён.
Беларускія турфірмы пачалі прапаноўваць аўтобусныя паездкі ў Маскву для атрымання шэнгенскіх візаў у візавым цэнтры Гішпаніі. Пра гэта паведамляе Рэспубліканскі звяз тураператараў Беларусі (РЗТА).
Гэтай вясной Польшча, Літва і Латвія прыпынілі выдачу такіх візаў. Гішпанскі візавы цэнтр у Менску спачатку прыпыніў прыняцце дакументаў, а потым увогуле зачыніўся. Пасля гэтага беларусы сутыкнуліся з цяжкасцямі пры адкрыцці турыстычнага шэнгену – запісацца ў візавыя цэнтры Італіі і Вугоршчыны даволі складана.
У адказ на попыт з'явіўся новы від арганізаваных паездак – турфірмы прапануюць звазіць у візавы цэнтр Гішпаніі ў Маскве.
Падаваць дакументы на візу і забіраць іх у расейскай сталіцы неабходна асабіста. Таму ехаць туды давядзецца два разы. Як правіла, віза робіцца за пяць працоўных дзён.
"Узамен пашпарта візавы цэнтр выдае дакумент пра знаходжанне пашпарта ў амбасадзе, з якім, як кажуць у турфірмах, можна перасячы мяжу", – паведамілі ў РЗТА і дапоўнілі, што доказаў візітаў у Гішпанію за апошнія 3–5 гадоў там не патрабуюць.
Кошт "шоптуру па візу" не паведамляецца.
Акрамя таго, турыстычныя шэнгенскія візы выдаюць у Беларусі візавы цэнтр Грэцыі і консульскі аддзел Францыі, удакладняюць у РЗТА.