Moderna прыступіла да распрацоўкі вакцыны ад воспы малпаў

Успышка воспы малпаў пагражае перарасці ў новую пандэмію.

Нядаўні ўсплёск у свеце воспы малпаў пагражае перарасці ў новую пандэмію. Тэмпы захворвання растуць, а вось універсальнай вакцыны па-ранейшаму няма. Кампанія Moderna пастанавіла выправіць сітуацыю і ўжо прынялася за распрацоўку прэпарату.

Пра гэта яна паведаміла на сваёй старонцы ў Twitter.

«Паколькі ў сакавіку 2022 года мы абвясцілі пра пашырэнне праграмы барацьбы з патагенамі, а таксама таму, што воспа малпаў мае глабальнае значэнне для грамадскай аховы здароўя, мы даследуем патэнцыйныя вакцыны супраць воспы малпаў на даклінічным узроўні».

У кампаніі пакуль не каментуюць, на якім этапе даклінічных выпрабаванняў знаходзяцца прэпараты і калі трэба чакаць вынікаў. Аднак гэтая вакцына можа стаць першай ухваленай мэтавай вакцынай супраць воспы малпаў. Пакуль што спецыялізаваных прэпаратаў для прафілактыкі гэтай хваробы ў Еўропе няма, але існуюць тыя, што дазваляюць прадухіліць хваробу з верагоднасцю 85 адсоткаў.