У Беларусі няма магчымасці лабараторна дыягнаставаць воспу малпаў
7- 24.05.2022, 17:25
- 2,918
Шэраг еўрапейскіх краін заявіў аб выпадках заражэння гэтым вірусам.
У Беларусі пакуль не могуць лабараторна дыягнаставаць воспу малпаў, але сярод медработнікаў праводзіцца навучанне дыферэнцыяльнай дыягностыцы захворвання. Пра гэта расказаў галоўны дзяржаўны санітарны лекар Беларусі Аляксандр Тарасенка, паведамляе прэс-служба Міністэрства аховы здароўя.
З ягоных слоў, спецыялістамі РНПЦ эпідэміялогіі і мікрабіялогіі вядзецца распрацоўка тэст-сістэм для своечасовай дыягностыкі захворвання. Плануецца, што айчынныя тэст-сістэмы будуць распрацаваныя да сярэдзіны чэрвеня.
«А калі ўзнікне неабходнасць да названага перыяду, можна зрабіць дыягностыку і адправіць матэрыял у інстытут «Вектар», які належыць Расспажыўнагляду», — заявіў Тарасенка.
Галоўны санітарны лекар таксама паўтарыў тэзісы Міністэрства аховы здароўя, агучаныя напярэдадні - магчымасць завозу інфекцыі «воспа малпаў» у Беларусь ацэньваецца, як нізкая, але для прадухілення трапляння ў краіну «воспы малпаў» Міністэрствам аховы здароўя ў пунктах пропуску на мяжы Беларусі ўзмоцненыя захады санітарна-карантыннага кантролю.
З 7 траўня ў 19 краінах свету быў пацверджаны 131 выпадак заражэння воспай малпаў, яшчэ 106 выпадкаў з'яўляюцца меркаванымі.