Як курс беларускага рубля патрапіў у вакуум

Нацыянальная валюта нібыта ўмацоўваецца, а кошты пры гэтым нешта не зніжаюцца.

Учора Белстат даў справаздачу аб красавіцкай інфляцыі, якая вырасла ў гадавым вылічэнні да 16,8 адсотка. Вось у сакавіку яна адразу скочыла з 10 да амаль 16, а ў красавіку тэмпы паскарэння інфляцыі атрымліваецца замарудзіліся. Але ў сакавіку кошты рэагавалі на зніжэнне беларускага рубель. А зараз умоўна-біржавы курс рубля толькі ўмацоўваецца, але нешта не заўважна, каб кошты пры гэтым зніжаліся. Ну, таму што біржавы курс рубля ён у асноўным тэарэтычны ў вакууме, а кошты - пытанне асабліва практычнае.

Вось Нацбанк учора парадаваўся, што высокі ўнутраны попыт у сакавіку не даў ВУП моцна ўпасці. Бо беларускія пакупнікі спяшаліся купіць тавары пакуль яны канчаткова не падаражэлі. Але гэта была, вядома, вельмі кароткатэрміновая з’ява. У красавіку ўжо дваццаць адсоткаў пакупнікоў эканомілі на ежы, а 50 адсоткаў адчулі падзенне сваіх даходаў. Гэта значыць, унутраны попыт пачаў дзейнічаць на эканоміку ў адваротны бок.

І, вядома, беларускі ўрад – не такі ўрад, які будзе гэта ўсё моўчкі трываць. Беларускі ўрад мае досвед эканамічнага стымулявання эканамічнага росту таннымі грашыма на практычна генетычным узроўні.

Так што, прэм'ер Галоўчанка ўчора выказаў недвухсэнсоўнае пажаданне аб зніжэнні стаўкі рэфінансавання. Хаця цяперашнія 12 адсоткаў стаўкі рэфінансавання і так ужо амаль у паўтара раза ніжэйшыя, чым інфляцыя.

Я б мог сказаць, што цяперашняя стаўка рэфінансавання - умоўная велічыня, ад якой мала што залежыць і што з ёю без усялякай шкоды можна рабіць што хочаш. Калі стаўка на 12 адсоткаў не перашкаджала выдаваць крэдыты пад 30 адсоткаў, то стаўка на дзесяць не перашкодзіць крэдытаваць хоць пад пяцьдзесят.

Але я так не скажу. Таму што стаўка рэфінансавання мае напраўду вялікае адміністрацыйна-практычнае значэнне. Гэта нас з табой яна не замінае крэдытаваць пад пяцьдзесят. А спецыяльна адобраных дзяржавай пазычальнікаў належыць крэдытаваць пад стаўку рэфінансавання. Гэта значыць, для спецыяльных пазычальнікаў крэдыты стануць таннейшымі. А для ўсіх астатніх, хто не спецыяльна ўхвалены, адпаведна будуць даражэйшыя, бо банкам трэба кампенсаваць свае страты. Ну і з інфляцыяй, праз перадазіроўку таннымі грашыма можа здарыцца яшчэ якое-небудзь паскудства.

Але няма ліха без дабра. Затое, вырасце роля і значэнне ў паўсядзённым эканамічным жыцці ўрада і прэм'ера Галоўчанкі. Таму што, гэта ж яны будуць аддзяляць спецыяльных пазычальнікаў ад усякіх... не такіх спецыяльных.

Telegram-канал "Лісты да дачкі"