На беларускіх прадпрыемствах пануе хаос

Прыхільнікі спрабуюць унікнуць свайго сумнага лёсу.

Пакуль лукашысты выпускаюць новыя ідыёцкія законы і заклікі, беларусы вымушаныя шукаць нейкія шчыліны, якія дапамагаюць выжываць у рэаліях дыктатуры. Прыхлебальнікі спрабуюць унікнуць свайго сумнага лёсу і як мага даўжэй дасядзець у сваіх кабінетах. Але часам такія законы могуць узмацніць разборкі жабаў і гадзюкаў у наменклатуры.

23 снежня генеральны пракурор Андрэй Швед паведаміў, што ў Беларусі ўпершыню прынялі "стратэгію ў барацьбе з карупцыяй", дзе асноўны ўпор зрабілі на тое, каб у барацьбе "максімальна задзейнічаць у працэсе грамадскасць". Швед чакае, што народ Беларусі пачне актыўна "стукаць" у праваахоўныя органы пра карупцыю і пра тое, што службовыя асобы жывуць не на сродкі.

Працоўныя прадпрыемстваў першапачаткова пасмяяліся з недарэчнай заявы пракурора, аднак, калі пачалі чуць ад кіраўніцтва спалоханыя каментары з гэтай нагоды, зразумелі: вось яно! Кіраўніцтва ў літаральным сэнсе "спаліла" сябе на тым, што цяпер у працоўных ёсць новы вагар ціску. Паколькі на "хлебныя" месцы на беларускіх заводах прызначаюцца альбо "свае людзі", альбо непасрэдна прамым распараджэннем зверху, 90% кіраўнікоў можна абвінаваціць у нейкіх карупцыйных схемах. Асабліва калі вывучаць закупкі на час рамонтаў і параўнаць кошт закупкі з коштам вытворцы. Тут у наяўнасці будзе ўсё – ад непатызму да прамых атрыманняў адкату.

Для прыкладу: мне ўспамінаецца мой цэх, у якім усталявалі дарагія ўзроўнямеры на даўно выведзенае з эксплуатацыі абсталяванне. Толькі на адной невялікай стадыі два абсалютна непатрэбныя прыборы коштам, на той момант, 32 тысячы еўраў. Упэўнены, калі палічыць такія закупкі на непрацоўнае абсталяванне на заводзе, сумы будуць з шасцю нулямі. Падлік на ўсіх прадпрыемствах Беларусі відавочна выведзе суму, на якую з нуля можна будзе пабудаваць новы прыбытковы завод.

Цяпер на прадпрыемствах пануе хаос. На кіроўныя пасады прыходзяць толькі лаяльныя да рэжыму асобы, якія, на жаль, мала разумеюць у мэнэджмэнце і маркетынгу. З аднаго боку, можна дазволіць ім разбураць эканоміку Беларусі і надалей, а можна прымусіць грызці глоткі адно аднаму, і тым самым паскорыць крах рэжыму. Адзін званок, хай нават ананімны, і адыёзнага кіраўніка проста задзяўбуць аўдытамі і відавочна што-небудзь ды знойдуць. Яны хацелі ўлады Лукашэнкі, яны не ўсталі на бок працоўных – цяпер наша чарга. За кожнага калегу, якога кінулі за краты лукашысты – сядзе чарговы прызначэнец. Як вядома, з імі цяпер таксама напружана, а значыць, вельмі хутка рэжым зоймецца самаліквідацыяй.

Арцём Чэрнікаў, спецыяльна для Telegram-канала «Баста!»