Саліст «Нагу звяло!» паказаў, як бацькі забітага акупанта сустракаюць Новы год

Максім Пакроўскі зняў новы кліп.

Фронтмэн расейскага гурта «Нагу звяло!» Максім Пакроўскі выпусціў кліп на песню «З Новым годам, сынок!». Ролік апублікаваны 20 снежня на YouTube-канале калектыву.

У кліпе зняліся расейскія акторы Чулпан Хаматава і Артур Смальянінаў, якія раней асудзілі напад Расеі на Украіну і пакінулі РФ. Відэа здымаліся ў сталіцы Латвіі Рызе.

Смальянінаў і Хаматава згулялі ў роліку бацькоў забітага на вайне расейскага акупанта. Па сюжэце яны адзначаюць Новы год без яго. У канцы кліпа бацька акупанта ўключае тэлевізар і пачынае глядзець прапагандысцкі канал, дзе, імаверна, транслюецца навагодні зварот прэзідэнта РФ Уладзіміра Пуціна.

«Вот и повестка. Не нужен билет

На поезд в чужую страну.

Берцы и каску, и бронежилет

Надо купить пацану.

Слезы застыли в холодной земле.

Скоро завянет венок.

Полная рюмка стоит на столе.

С Новым годом, сынок!

Полная рюмка стоит на столе.

С Новым годом, сынок!»

«Мы выпускаем нашу працу ў свет, мы зрабілі ўсё, што маглі. Цяпер ваша чарга дапамагчы нам дастукацца да тых, хто чагосьці яшчэ не зразумеў у падзеях, якія адбываюцца», – напісаў у дзень прэм'еры кліпа артыст у Instagram.

«І нават пасля здарэння працягваюць вытарэшчвацца ў тэлевізар», - адрэагавалі гледачы на прэм'еру антываеннага кліпа.