У Расонах беларус ударыў міліцыянера і нацкаваў на яго мастыфа

Інцыдэнт здарыўся на падыходзе да мясцовага РАУС.

П'яны мужчына напаў на міліцыянераў у Расонах, распачатая крымінальная справа. Пра гэта паведамляе тэлеграм-канал сілавікоў.

Інцыдэнт адбыўся ўвечары 10 лістапада. Паведамляецца, што нецвярозы зваршчык шпацыраваў з мастыфам. Калі яны праходзілі міма рэстарацыі, сабака тузануўся, таму мужчына ўпаў. Наведвальнікі рэстарацыі гэта заўважылі і бурна адрэагавалі. Падняўшыся, мужчына пайшоў у рэстарацыю «на разборкі», але там проста выклікалі міліцыю.

«Супрацоўнікі пагрузілі зваршчыка з мастыфам у машыну і павезлі ў РАУС для разбору. Ужо на падыходзе да будынка нецвярозы мужчына ўдарыў аднаго з міліцыянтаў у сцягно і спрабаваў нацкаваць сабаку», - паведамляецца ў тэлеграм-канале.

За «гвалт» у дачыненні да супрацоўніка міліцыі на мужчыну завялі крымінальную справу.