З 1 снежня ў Беларусі вырастуць кошты цыгарэтаў

Некаторыя падаражэюць адразу на 1,5 рублі.

У Беларусі з 1 снежня падаражэюць некаторыя маркі цыгарэтаў. Пра гэта паведамляе Міністэрства падаткаў і збораў. Кошты некаторых марак вырастуць на 1,5 рублі. Нагадаем, у лістападзе вытворцы і імпарцёры цыгарэтаў не падвышалі кошты на фоне ўвядзення новай схемы дзяржрэгулявання коштаў.

Гарадзенская тытунёвая фабрыка «Нёман» са снежня на 1,5 рубля павысіць кошты на Cooper super slims Red, Cooper super slims Gold, COOPER nano white, COOPER nano white, Velvet Red, Velvet Blue – да 3,8 рубля. Цыгарэты Rider City, Rider Desert, Rider Air стануць даражэйшымі на 1,3 рубля (будуць са снежня каштаваць 3,8 рубля). Гэта вынікае з звестак на сайце МПЗ.

Таксама з'явіцца ў продажы новая марка цыгарэтаў – Dove. Са снежня «Нёман» стане таксама прадаваць NZ Black Power TF.

«Тытунь-інвест» сярод іншага на 40 капеек падніме кошты на Winston Super Slims Blue (да 5,2 рубля), Camel Studio Sunny Mix (да 4,35 рубля), Sobranie Evolve (да 5,4 рубля).

Кампанія «Інтэр Табака» ў снежні не плануе падвышаць кошты.

«Беларусьгандаль» сярод іншага на 20 капеек падніме кошты на Pall Mall Nano Fusion, Pall Mall Nano Coral – да 4 рублёў.