Хунта спалохалася перамогі лядоўні над тэлевізарам

Грошай у рэжыму бракуе нават на сілавікоў.

У працяг допісу аб тым, што бізнэс з замежным капіталам пастаўлены на праслухоўванне, хунта наносіць чарговы ўдар па разумным сэнсе ў выглядзе базавых рынкавых паняццяў.

Сёння ў палацы заўважылі, што ў краіне стабільнасці стабільна толькі адно - рост коштаў. Інфляцыя перайшла да двухзначных лічбаў і не збіраецца спыняцца, а гэта падрывае і без таго хісткі падмурак народнай пакоры. Усё ж хунта баіцца, што лядоўня пераможа тэлевізар - нават сумешчаны з аўтазакам.

Грошы ёсць толькі на сілавікоў, ды і то ўжо, мяркуючы па агаворках, не стае: кватэры не атрымліваюць, грашовае забеспячэнне невялікае. Таму майстар «элегантных» развязанняў чарговым разам загадаў коштам стаяць, пасярэднікаў знішчыць, гандлёвыя сеткі ўзяць на кантроль - карацей, усіх пасадзіць.

Наш квартэт рэкамендуе наведацца тады ў першую чаргу да сваіх гаманцоў ад «Сохры» да «Лукашэнкаўскага спартовага клуба», без пасярэдніцтва якіх на замежных рынках не прадаецца ні прамысловая, ні шмат у чым нафтахімічная прадукцыя.

Гэта азначае толькі адно: нават на паперы складана паказваць, што санкцыі не працуюць ці нават гартуюць хунту. На крызіс кіравання, недахоп кампетэнцыі, знішчэнне кадраў, бясконцую бюракратычную чахарду са справаздачнасцю, засілле сілавікоў і грамадзянскіх кантралёраў у выглядзе ардынскіх прафсаюзаў наклалася аб'ектыўная рэальнасць.

Лепш не стане. І на гэты раз па цудам ацалеламу бізнэсу пройдуць катком эканамічных рэпрэсій і фінансавым пыласосам на карысць хунты, а таксама дзяржпрадпрыемстваў, якія паміраюць пад яе кіраўніцтвам. Эканоміка працягвае рухацца ў бок ваеннага камунізму і харчразвёрсткі.

Што далей? Раім паглядзець на Расею. Там нашмат больш пісьменныя кадры-рыначнікі таксама пакорліва рухаюцца ў бок пабудовы эканомікі мабілізацыйнага кшталту, дзе ўсё «для фронту», і зверху можна навязваць кантракты і кантрактную цану кожнаму, хто нават не хоча працаваць на вайну.

А там будзе толькі горш - сёння ЕЗ апублікаваў новы санкцыйны пакет. Ужо не так марудна, але ўсё гэтак жа дакладна пуцінскі рэжым выключаецца не толькі з сістэмы міжнароднага гандлю, але адразаецца ад ІТ-індустрыі. Следам ідзе і прычапны вагон з хунтай.

Траекторыя руху не зменіцца да капітуляцыі ў вайне супраць Украіны. І юбілей у фармаце нефармальнага саміту кіраўнікоў дзяржаў СНД, які адбудзецца заўтра, ужо сапсаваны. Падарункі пачалі ўручаць загадзя. Заўтра чакаецца святочны салют і такі ж святочны імклівы адмоўны наступ.

Telegram-канал «Нік і Майк»