Вайсковы аналітык распавёў, як украінскаму войску ўдаецца падмануць ворага на фронце

У войску РФ вялікія праблемы з аператыўнасцю, гнуткасцю і ініцыятыўнасцю.

Афіцэр Арміі абароны Ізраілю і вайсковы аналітык Ігаль Левін распавёў, якім чынам украінскаму войску ўдаецца падмануць ворага на фронце:

- У ізраільскім эканамічным выданні «Калькаліст» апісалі тыповую ўкраінскую тактыку падчас наступу. Ізраільцяне знаходзяць яе падобнай на робатаў-трансформераў, якія са шматлікіх маленькіх частак збіраюцца ў аднаго вялікага робата.

Украінскае войска не ваюе, як звычайнае рэгулярнае войска і не канцэнтруе адразу ўсе свае сілы. Атака пачынаецца на шматлікіх кірунках невялікімі сіламі - расейцы проста не могуць зразумець, звычайны гэта рэйд ці папярэднік вялікага нападу.

Калі расейскі жаўнер бачыць некалькі адзінак украінскай тэхнікі, ён думае, што гэта рэйд і паведамляе пра гэта (калі ўвогуле ў яго ёсць магчымасць паведаміць). Тое ж самае бачаць і на іншых кірунках. У выніку эфір забіты процьмай спам-паведамленняў аб адным танку тут, двух ББМ там, трох «Хамві» недзе яшчэ і г.д. Старэйшыя камандзіры такія паведамленні проста ігнаруюць: не будзе ж камандзір батальёна ці палка адцягвацца ажно на цэлы асобны танк ці пару выпадковых багі. Маўляў, няхай на месцах і знішчаюць іх сваімі сродкамі.

Насамрэч гэта ўсё часткі вялікага наступу, і калі расейцы ўжо думаюць, што гэта не больш за ДРГ, усе гэтыя падраздзяленні аб'ядноўваюцца ў кулак і разам выходзяць на прарыў і штурм. Паведамляць пра гэта ўжо позна, бо парадкі ворага ўжо пляжаць і трэба аператыўна рэагаваць на абстаноўку. А з аператыўнасцю, гнуткасцю і ініцыятыўнасцю ў расейцаў, як вядома, вельмі вялікія праблемы.

Развязаць гэтую праблему маглі б выведвальныя БПЛА ў належнай колькасці і якасці, але з імі ў УС РФ усё максімальна дрэнна.

УС РФ сляпыя: іх выведка нікуды не вартая, а артылерыя і дальнабойныя сродкі паразы не ўмеюць дзейнічаць на паражэнне рухомых цэляў. Гэта значыць, калі ўкраінскія часткі ўжо перайшлі ў атаку і нясуцца наперад, расейскім падраздзяленням проста няма чым гэта спыняць. Верталёты і авіяцыя таксама не ратуюць, бо расейцы не ўмеюць іх выкарыстоўваць і ўвесь час губляюць дарагія машыны, збітыя ўкраінскімі ЗРК і ПЗРК.

Такое вось спалучэнне фактараў плюс адсутнасць баявога духу расейскіх жаўнераў - усё гэта кожны раз прыводзіць украінскі наступ да поспеху і далейшай паэтапнай дэакупацыі сваёй тэрыторыі.