Унікальнае відэа: УСУ з дапамогай брытанскіх MLRS б'юць па камандных пунктах акупантаў

Абстрэл быў зняты пры падрыхтоўцы наступу ўкраінскай арміі на Ліман.

Журналісты выдання Sky News паказалі працу брытанскіх пускавых установак MLRS на перадавой. Рэпартаж быў зняты пры падрыхтоўцы наступу Узброеных сілаў Украіны на Ліман, што ў Данецкай вобласці.

Адпаведная публікацыя размешчаная на сайце выдання. «Дзякуючы гэтай зброі мы выканалі сапраўды першачарговыя задачы», – сказаў камандзір артылерыйскай часткі, які пажадаў застацца неназваным з меркаванняў бяспекі.

Дзякуючы MLRS украінскія абаронцы наносяць удары па ваенных базах, калонах бронетэхнікі і складах боепрыпасаў. Рэпартаж быў зняты 29 верасня, а ўсяго праз два дні горад быў адбіты ўкраінскімі абаронцамі.

Камандзір адзначыў, што, на ягоную думку, блізу 30% поспехаў Украіны ў буйным контрнаступе на ўсходзе былі дасягнутыя дзякуючы брытанскім і нямецкім ракетным устаноўкам.

«Гэта адзін з ключавых чыннікаў, які прымусіў расейскую армію не проста адступіць, а ўцячы», – сказаў афіцэр.

Камандзір і некалькі ягоных людзей прайшлі навучанне ў Вялікай Брытаніі ў працы з сістэмай.

«Нам шмат далі... Дзякуючы навучанню ўсяго праз тры дні пасля вяртання з Англіі мы ўжо выконвалі заданні», – дадаў афіцэр.

Брытанскай MLRS кіруюць тры салдаты: адзін аддае каманды, другі правярае правільнасць каардынатаў цэлі на ўбудаванай кампутарнай панэлі, а трэці кіруе машынай.

Камандзір артылерыяй, чыё падраздзяленне выкарыстоўвае шэсць брытанскіх рэактыўных сістэмаў залпавага агню, а таксама тры нямецкія пускавыя ўстаноўкі MARS II, сказаў, што яны маюць толькі асабліва важныя цэлі. Іх запасы ракетаў невялікія, таму ўкраінцам даводзіцца выбіраць.

Ракеты, выпушчаныя брытанскай сістэмай, маюць дакладнае навядзенне і далёкасць дзеяння большую за 80 км. Гэта азначае, што яны вельмі дакладныя і змяншаюць верагоднасць ахвяраў сярод цывільнага насельніцтва.

Наадварот, большая частка расейскіх артылерыйскіх сістэмаў – і пускавыя ўстаноўкі савецкіх часоў, якія раней выкарыстоўваліся Украінай – павінны абстраляць цэль залпам ракетаў, каб гарантаваць яе знішчэнне, што патрабуе значна большай колькасці боепрыпасаў і выклікае значна больш пабочных разбурэнняў.