Журналісты знайшлі новыя палацы і катэджы сям'і Назарбаева

Плошча тэрыторыі, дзе знаходзіцца нерухомасць - 135 гектараў.

Сям'і першага прэзідэнта Казахстана Нурсултана Назарбаева належаць палацы і катэджы на тэрыторыі 135 га ў перадгор'і Заілійскага Алатаў. Пра гэта гаворыцца ў расследаванні «Азатыка».

Як піша выданне, асабнякі і палацы належаць самому экс-прэзідэнту, а таксама тром ягоным дочкам і пляменніку Кайрату Сатыбалды. Журналісты зазначаюць, што ўсе аб'екты абнесеныя высокай загародай, а на некаторых пляцоўках яшчэ вядуцца будаўнічыя работы.

Малодшай дачцэ Назарбаева Аліі і яе мужу Дзімашу Дасанаву належаць 2,8 га. Паводле звестак выдання, на іх пляцы быў дом з чырвоным дахам, аднак яго знеслі ў 2019 годзе, пасля чаго на месцы будынка нічога не пабудавалі.

Плошча надзела сярэдняй дачкі - Дынары Кулібаевай - складае 7,5 га. «Азатык» піша, што на тэрыторыі ўзведзеныя тры асабнякі. Акрамя таго, на пляцы ёсць штучная сажалка, летні шацёр і дом для абслуговага персаналу.

Дом дэпутата Дарыгі Назарбаевай, старэйшай дачкі экс-прэзідэнта, цяпер будуецца на пляцоўцы плошчай 4,6 га. Плошча палаца складае амаль 2350 кв. Яго будаўніцтва вядзецца з 2018 года, і, як зазначаецца, аддзелачныя работы яшчэ не скончаныя. Акрамя гэтага, Назарбаевай належаць яшчэ тры зямельныя надзелы, агульная плошча якіх складае амаль 6,5 га.

На жонку пляменніка Назарбаева Кайрата Сатыбалды запісаны палац плошчай 2500 м² з добраўпарадкаванай тэрыторыяй, верталётнай пляцоўкай, пяццю катэджамі, домам для персаналу і складамі.

«Азатык» дадае, што пляц самога Нурсултана Назарбаева займае амаль 13 гектараў. На пляцы размешчаныя штучная сажалка, тэнісны корт, палацы і верталётныя пляцоўкі. Выданне падкрэслівае, што ў адным з катэджаў на гэтай тэрыторыі раней жылі першы сакратар Кампартыі Казахстана Дынмухамед Кунаеў і яго пераемнік Генадзь Колбін, аднак у 1990-х гадах нерухомасць перайшла ва ўласнасць Назарбаева.

У матэрыяле «Азатыка» адзначаецца, што астатняя тэрыторыя належыць карпарацыі «Алмалы». Адна з яе кіраўнічых кампаній - афшор у Нідэрландах, тады як іншая належыць людзям з асяроддзя Нурсултана Назарбаева.