Тэлефонныя махляры сталі зусім нахабныя: Беларусам прапануюць развязаць пытанне з «кілерам»

Незвычайную гісторыю расказалі жыхары Гародні і Рэчыцы.

На рэдакцыйную пошту сайта onliner.by напісаў Мікола з Гародні. Мужчына расказаў, што яму на Whatsapp ад незнаёмага нумара прыйшло паведамленне, што нехта замовіў ягонае забойства за $2900. Міколу пісаў непасрэдна «кілер» – прапаноўваў выкупіць інфармацыю пра заказчыка.

Невядомы напісаў Міколу з в'етнамскага нумара: «Я звязаны з крыміналам даўнавата. Тры дні таму паступіў званок, нейкі чалавек замовіў цябе прыбраць. Агульны час замовы – тыдзень. Папрасілі прыбраць цябе хораша, перарэзаць горла ці закапаць жывым. Званок быў праз знаёмага, ён атрымаў усю інфармацыю пра заказчыка. Ён прапанаваў за цябе $600 авансам. І пасля таго, як усё зробім, $2300. Паводле плану прыехаць да цябе ў горад трэба праз тры дні. Цяпер давай падумаем, што больш выгадна для мяне».

Далей Міколу прапанавалі дапамогу – не бясплатную: «Сувязі ў мяне ёсць, дапамогу ад мяне атрымаеш. А наконт кошту інфармацыі – колькі гатовы за гэта заплаціць, столькі і кажы. Я сам вызначу – выгадна гэта ці не».

Дыялог з ашуканцам Мікола пастанавіў скончыць надта не пачынаючы – пажадаў невядомаму ўдачы і заблакаваў кантакт. У міліцыю гарадзенец пастанавіў не звяртацца.

Пазней у наш чат-бот напісаў Руслан з Рэчыцы. Ён атрымаў дакладна такое самае паведамленне з гэтага ж тэлефоннага нумара, але, у адрозненне ад Міколы, стаў перапісвацца з ашуканцам – абодва абменьваліся ўзаемнымі нецэнзурнымі паведамленнямі.

– Будзеце пісаць заяву ў міліцыю? – спыталі журналісты ў Руслана.

– Не – зразумела, што напісаў нейкі блазан, а хтосьці можа і павесціся.