Хацкевіч аб сітуацыі ў белфутболе: Маразм поўны

Пастановы, якія прымаюцца ў Доме футбола, зусім абсурдныя і непрафесійныя.

Былы галоўны трэнер нацыянальнай каманды Беларусі ў футболе Аляксандр Хацкевіч пракаментаваў падзеі, якія адбыліся ў беларускім футболе за апошні час, піша «Трибуна».

- Цяпер беларускім клубам забаронена выязджаць на перадсезонныя зборы за мяжу. Пракаментуеце?

- У маім разуменні - маразм поўны! Вы паглядзіце, колькі каманд праводзяць падрыхтоўку ў Турцыі, Гішпаніі, Эміратах. Выходзіць, усе рыхтуюцца няправільна і толькі ў Беларусі знайшлі аптымальную мадэль? Невытлумачальна.

- Як мяркуеце, ці патрэбныя беларускаму футболу ліміты - узроставы, легіянерскі?

- Ужо неяк выказваў пункт гледжання на гэты конт. На мой погляд, усе ліміты, усе абмежаванні ні да чога добрага не вядуць. Яны непрымальныя. Магчыма, яны прапісаныя ў гэтай чароўнай праграме, паводле якой нацыянальная каманда Беларусі да 2028 года павінна патрапіць на топ-турнір?

Раз так, у федэрацыі, відаць, ведаюць, што робяць. Толькі занадта доўгую кіраўнічую кар'еру адмералі сабе тыя, хто складаў «Канцэпцыю» - бо несці адказнасць за невыкананне ўжо напэўна будуць не яны.

- Раз вы закранулі «Канцэпцыю развіцця футбола да 2028 года», то працытую адну яе тэзу: «адна з прычын няўдалых выступаў нацыянальнай каманды – адсутнасць адзінага патрыятычнага духу і нежаданне выконваць гімн». Як мяркуеце, гэта сапраўды важна?

- Мне чамусьці здаецца, што адсутнасць гульнявога стылю, індывідуальнага майстэрства і класа, упэўненасці ва ўласных сілах - вось асноўныя праблемы.

А гімн? Каб яго спяваць, трэба найперш ведаць словы. Паглядзіце, як яго выконваюць футбалісты з іншых краін перад матчамі. Ці вывучылі беларусы? Не ўпэўнены.

- Вы меркавалі, што Кандрацьеў прадоўжыць працу з нацыянальнай камандай яшчэ за пару месяцаў да таго, як яго зацвердзілі ў якасці галоўнага трэнера. Цяпер - гэта аптымальная кандыдатура?

- Пастановы, якія прымаюцца ў Доме футбола, на мой погляд, зусім абсурдныя і непрафесійныя. Бо кіраўнікі БФФ разам з галоўным трэнерам павінны несці роўна такую ж адказнасць за вынік, - сказаў Хацкевіч.