Нямеччына адмовілася плаціць кампенсацыю за адмову сертыфікаваць «Паўночны струмень - 2»

Аб гэтым заявіў віцэ-канцлер, міністр у справах эканомікі і абароны клімату ФРГ.

Нямеччына не павінна будзе плаціць кампенсацыю, калі нацыянальны рэгулятар прызнае газаправод Nord Stream 2 не адпаведным праву Еўразвяза. Пра гэта заявіў віцэ-канцлер, міністр у справах эканомікі і абароны клімату ФРГ Роберт Хабек у апублікаваным у пятніцу інтэрв'ю часопісу «Шпігель».

«Федэральнае сеткавае агенцтва цяпер прыпыніла сертыфікацыю, паведамляе finanz.ru. Калі яна адновіцца, то будзе вызначацца, ці ёсць умовы для выдачы дазволу [на перапампоўванне газу] у адпаведнасці з нямецкімі і еўрапейскімі правіламі. Калі не, то не будзе кампенсацый, якія падлягаюць выплаце», - сказаў ён, не прывёўшы якіх-небудзь падрабязнасцяў на гэты конт.

Міністр сцвярджаў, што Nord Stream 2 «заўсёды быў геапалітычным праектам» у тым сэнсе, што праз яго ў тэорыі ўжо не спатрэбяцца ўкраінскія транзітныя магутнасці. З ягоных слоў, актуальным застаецца пагадненне, укладзенае ў ліпені паміж Берлінам і Вашынгтонам, у якім гаворыцца, што калі энэргетыка будзе выкарыстоўвацца Расеяй «як зброя», то будуць наступствы.

Аб сітуацыі вакол Nord Stream 2

Будаўніцтва Nord Stream 2 цалкам скончылася 10 верасня 2021 года. Першапачаткова яго планавалася скончыць да канца 2019 года, аднак праз санкцыі ЗША будаўніцтва затрымлівалася. Газаправод складаецца з дзвюх нітак агульнай магутнасцю 55 млрд куб. м на год, якія пралягаюць ад узбярэжжа Расеі праз Балтыйскае мора да Нямеччыны.

Для запуску газаправода кампаніі Nord Stream 2 AG трэба атрымаць рэгістрацыю ў якасці незалежнага транспартнага аператара. 16 лістапада Федэральнае сеткавае агенцтва Нямеччыны прыпыніла сертыфікацыю і запатрабавала нанова падаваць дакументы. Рэгулятар адзначыў, што працэс адновіцца, калі кампанія са штаб-кватэрай у швайцарскім горадзе Цуг перадасць асноўны капітал, які датычыцца нямецкага сегмента, ва ўласнасць нямецкага даччынага прадпрыемства. У ФРГ неаднаразова сцвярджалі, што рэгулятар пры правядзенні сертыфікацыі не кіруецца палітыкай.