Марк Бжэзінскі стаў новым амбасадарам ЗША ў Польшчы
1- 20.01.2022, 19:40
- 3,994
Ён паабяцаў супрацоўнічаць з польскімі ўладамі ў падтрымцы дэмакратычных памкненняў беларускага народа.
19 студзеня кандыдат прэзідэнта Джо Байдэна на пасаду амбасадара ЗША ў Польшчы Марк Бжэзінскі быў урачыста прыведзены да прысягі ў Белым доме. Прысягу прымала віцэ-прэзідэнт ЗША Камала Харыс, паведамляе «Радио Польша».
Нагадаем, 4 жніўня прэзідэнт Джо Байдэн прызначыў Марка Бжэзінскага амбасадарам у Польшчы, але праз палітычныя рознагалоссі паміж дэмакратамі і рэспубліканцамі ў Сенаце ў іншых пытаннях, яго кандыдатура была афіцыйна зацверджаная толькі 18 снежня.
Падчас цырымоніі ў Белым доме Бжэзінскі назваў Польшчу верным хаўруснікам ЗША і заявіў, што будзе працаваць над умацаваннем вайсковага і эканамічнага супрацоўніцтва ў рэгіёне ў рамках ініцыятывы «Трымор'е», а таксама супрацоўнічаць з польскімі ўладамі ў падтрымцы Украіны і дэмакратычных памкненняў беларускага народа.
Марк Бжэзінскі - сын былога дарадцы прэзідэнта ЗША ў нацыянальнай бяспецы і вядомага амерыканскага палітолага польскага паходжання Збігнева Бжэзінскага.
Раней Марк Бжэзінскі займаў пасады ў Радзе нацыянальнай бяспекі і Пентагоне. Ён таксама быў паслом ЗША у Швецыі.