У Беларусі фіксуецца рост захворвання на грып і ВРІ
2- 20.01.2022, 16:06
- 7,824
Ужо перавышаныя паказчыкі мінулага года.
У Беларусі пачалі больш хварэць на ВРІ і грып. Паказчык захваральнасці павялічыўся на 3,7 адсотка і перасягнуў мінулагодні на 9,6 адсотка. Пра гэта паведамляе zerkalo.io са спасылкай на Міністэрства аховы здароўя.
Згодна з вынікамі даследаванняў, прырост захваральнасці на ВРВІ і грып пачаўся на другім каляндарным тыдні студзеня.
У краіне паказчык захворвання павялічыўся на 3,7 адсотка і перасягнуў мінулагодні на 9,6 адсотка.
У краіне цыркулююць вірусы грыпу A (H3N2), A (H1N1), грыпу В, рэспіраторных вірусаў негрыпознай этыялогіі: парагрыпу, адэнавірусу, РС-вірусаў, рынавіруса.
Пераважна цыркулююць вірусы грыпу A(H3N2), выяўляць іх пачалі з апошняй дэкады лістапада мінулага года.
Як адзначаюць беларускія спецыялісты, можна гаварыць аб тым, што, як і ва ўсім Еўрапейскім рэгіёне, адзначаецца супольная цыркуляцыя пандэмічнага віруса SARS-CoV-2, вірусаў сезоннага грыпу і іншых рэспіраторных вірусаў.
У Еўропе грып вяртаецца з новай сілай. Гэта выклікае асцярогі з нагоды «цвіндэміі» - падвойнай пандэміі.
Паводле інфармацыі Еўрапейскага цэнтра прафілактыкі і кантролю захворванняў (ECDC), у снежні колькасць выпадкаў грыпу ў еўрапейскіх аддзяленнях інтэнсіўнай тэрапіі няўхільна расла, дасягнуўшы піка 43 хворых на апошнім тыдні года. Летась у снежні быў толькі адзін выпадак грыпу.
Вяртанне віруса можа стаць пачаткам незвычайна доўгага сезона грыпу, які можа зацягнуцца да лета.
Дарэчы, супраць грыпу ў Беларусі прышчэплена больш за 40 адсоткаў насельніцтва.