ЗША распрацавалі пакет «вельмі балючых» санкцый супраць Расеі

Пастанова ўжо прынятая.

Міністр замежных спраў Дзмітрый Кулеба расказаў, што ЗША распрацавалі пакет «вельмі балючых» санкцый супраць Расеі, якія могуць нанесці разбуральны ўдар па яе эканоміцы ў выпадку агрэсіі супраць Украіны.

Пра гэта ён заявіў падчас онлайн-брыфінгу.

«Я не магу раскрываць усе дэталі, бо на гэты момант на фінішнай прамой ідзе праца ва ўзгадненні дзеянняў паміж Злучанымі Штатамі і іх еўрапейскімі хаўруснікамі, і вельмі важна ёй не нашкодзіць. Але прынцыпова, што пастанова ў Вашынгтоне ўжо прынятая: ЗША гатовыя ўжыць усю магутнасць сваіх эканамічных і фінансавых інструментаў, каб перакрыць кісларод расейскай эканоміцы і расейскім багатырам», — адзначыў Кулеба.

19 студзеня Байдэн заявіў, што Расею чакаюць катастрафічныя наступствы, калі Пуцін наважыцца пачаць вайсковае ўварванне ва Украіну.

З канца кастрычніка Расея сцягвае войскі да ўкраінскіх межаў. Заходнія СМІ са спасылкай на крыніцы паведамлялі, што расейскае ўварванне ва Украіну можа адбыцца ў пачатку 2022 года, да гэтага прыцягнуць амаль 175 тысяч вайскоўцаў РФ.

Сакратар Рады нацбяспекі і абароны Аляксей Данілаў заявіў, што ўлады Украіны не бачаць наўпроставай пагрозы ўварвання Расеі. У пачатку снежня міністр абароны Аляксей Рэзнікаў сказаў, што новая хваля ваеннай агрэсіі РФ супраць Украіны можа пачацца ў канцы студзеня 2022 года.

У МЗС РФ кажуць, што не рыхтуюць уварванне ва Украіну і «не збіраюцца ні на кога нападаць». Пры гэтым Крэмль патрабуе ад ЗША і NATO гарантый неўступлення Украіны ў Альянс.