«У нас у горадзе няма такога попыту, каб плаціць такія падаткі»

Беларускія ІП разважаюць, як працаваць у новых варунках.

З пачатку года для многіх прадпрымальнікаў скасавалі спрошчаную сістэму падаткаабкладання. Што рабіць тым, каго закранулі змены? ІП расказалі, якія варыянты яны шукаюць, каб не страціць у грошах.

«Выдаткаў як такіх у мяне няма, таму падатак лічыцца ад усяго прыбытку»

Уладзімір сем гадоў займаецца міжнароднай лагістыкай. З 2019-га адкрыў сваё ІП. Да падатковых змен ён працаваў паводле спрошчанай сістэмы і плаціў 5% падатку. Цяпер пераходзіць на агульную сістэму з падаткам 16%.

«Выдаткаў як такіх у мяне няма: я працую дома, з абсталявання кампутар і крэсла. Таму падатак будзе лічыцца ад усяго прыбытку», - кажа мужчына.

Каб не страціць у грошах, ён будзе павялічваць кошт сваіх паслуг.

«Напрыклад, я вязу тавар за 100 даляраў, а кліент плаціць 150. З гэтых 50 даляраў мне трэба аддаць 16% падатку. Буду павялічваць свой профіт. Аднак кліент істотна не адчуе, я працую з замежнікамі», - тлумачыць Уладзімір.

Можна было б адкрыць фірму і працаваць паводле спрошчанай сістэмы, але прадпрымальнік не бачыць у гэтым сэнсу.

«Пералічэнне грошай на картку давялося б рабіць праз дывідэнды, і з іх таксама плаціць 16% падаходнага падатку».

«Буду падвышаць кошты»

Вольга як ІП надае бухгалтарскія паслугі. З яе падлікаў, падаткі для яе вырастуць у 2,6 разы.

«Гэта калі адымаць выдаткі, а інакш рост быў бы ўтрая. Мне выгадна ўказваць выдаткі як 20% ад прыбытку, без пацверджання дакументамі», - кажа жанчына.

Яна ўжо на пенсіі, але, нягледзячы на змены ў падатках, закрывацца не плануе.

«Пенсія самі разумееце якая. Яшчэ ёсць здароўе працаваць. Буду падвышаць кошты. Абгаварылі гэта з кліентамі яшчэ да Новага года, каб яны разумелі, чаго чакаць. Яны безвыходна адрэагавалі, - усміхаецца. - Бухгалтар ім патрэбен, ды і даўно працавалі разам».

«Тут такая пастка, што пераафармленне не дапаможа»

«Тут такая пастка, што пераафармленне не дапаможа, - кажа яшчэ адзін прадпрымальнік аб магчымым выхадзе з сітуацыі. - Адзін варыянт - калі ў кошце паслугі шмат выдаткаў, то ўлічваць іх, але тут патрэбен прафесійны бухгалтар. Ну і скарачаць безнаяўны разлік і імкнуцца працаваць за гатоўку».

Ігар надае сантэхнічныя паслугі ў абласным горадзе. Наняць бухгалтара яму каштавацьме ад 50 даляраў на месяц, у залежнасці ад аб'ёму працы.

«Ёсць паслугі, у якіх 50-60% - гэта матэрыялы і падаткі. Напрыклад, усталяваць пральную машыну каштуе 80 рублёў, але для гэтага патрэбен кран, шлангі, перахаднікі. Гэта недзе 35 рублёў. Бываюць паслугі, дзе толькі праца», - удаецца ў дэталі мужчына.

Прадпрымальнік таксама збіраецца падымаць кошты - і для арганізацый, і для фізічных асоб.

«Многія знаёмыя плануюць закрывацца або пераходзіць на наяўныя разлікі. Цяпер ІП мала чым адрозніваецца ад мікрафірмы. Адзінае, што да трох працаўнікоў абмежаванне.

Самае крыўднае, што яны падвышаюць падаткі і не прапануюць нічога наўзамен. У нас у горадзе няма такога попыту і абарачэння, каб плаціць такія падаткі не паводле спрошчанай сістэмы», - дзеліцца набалелым Ігар.

«800 лішніх рублёў кожны месяц трэба аддаць на падаткі»

Васіль з жонкай гандлююць прадуктамі, трымаюць дзве невялікія крамкі ў гандлёвым цэнтры. Яны плацяць адзіны падатак. Раней гэта было 137 рублёў за месяц за кожную. З гэтага года стаўка істотна вырасла - да 548 рублёў.

«Заробак апошнім часам на дваіх складаў 2000-2500 рублёў. Цяпер з іх яшчэ 800 лішніх кожны месяц трэба аддаць», - прыводзіць лічбы прадпрымальнік.

Мужчына даўно працуе як ІП, кажа, раней калі падаткі падвышалі, гэта было плюс 5-10%. Такі скок упершыню.

«Паспрабуем падняць крыху кошты, хоць гэта абсалютна не выйсце са становішча, яны і так растуць у закупачнай цане. Ды і пакупная здольнасць народа, можна сказаць, ніякая. Пару месяцаў папрацуем паводле новых ставак, а што далей - абсалютна не ведаем».