Улады ўзмацняюць жорсткасць правілаў для ўладальнікаў аграсядзіб

Што зменіцца?

У Беларусі плануецца змяніць указ "Аб развіцці аграэкатурызму", а дакладней - узмацніць жорсткасць, піша SmartPress. Мэта - не дазволіць пад выглядам аграсядзіб развіваць гатэльны і рэстаранны бізнэс.

Як прагучала ў эфіры тэлеканала СТВ, частка ўладальнікаў такіх аб'ектаў, плацячы падаткі льготным тарыфам, замест развіцця аграэкатурызму проста здаюць дамы для вечарынак, госці якіх моцна перашкаджаюць суседзям.

Гісторыя развіцця агратурызму пачалася ў 2006 годзе, паведамляе тэлеканал: «Але ўказ відазмяняўся, і патрабаванні да ўладальнікаў аграсядзіб станавіліся ўсё мякчэйшымі. Патуранні прывялі да пэўных наступстваў: зараз кожны гаспадар прыватнага дома можа атрымаць статус аграэкааб'екта, але займацца староннімі рэчамі».

Галоўны юрысконсульт дэпартамента турызму міністэрства спорту і турызму Аляксандр Крэчатаў распавёў СТВ аб планаваных зменах.

- Асноўныя змяненні будуць накіраваны на тое, каб вызначыць канкрэтна, чым могуць займацца суб'екты аграэкатурызму, на патрабаванні, якія выстаўляюцца да дзейнасці ў сферы аграэкатурызму і, вядома ж, будуць прадастаўлены паўнамоцтвы раённым выканаўчым камітэтам, аналітыкі дзейнасці суб'ектаў аграэкатурызму, - паведаміў ён.

Другі вельмі важны момант, дадаў юрысконсульт, каб гэта былі зямельныя надзелы ўстаноўленага нарматыву, каб было не менш як 0,15 сотых гектара. Яшчэ адно важнае патрабаванне - гэта наяўнасць жылых пакояў для пражывання аграэкатурыстаў, іх павінна быць не больш за 10 для пражывання. І, канешне, каб была магчымасць для азнаямлення турыста з аб'ектамі і народнымі традыцыямі адпаведнай мясцовасці.