«Вертыкаль у кожны момант можа пасыпацца»

Развянчанне культу асобы – пытанне даволі хуткае

Дэпутаты мажыліса Казахстана ініцыявалі папраўкі аб скасаванні пажыццёвага старшынства Елбасы ў АНК (Асамблея народа Казахстана), піша Telegram-канал «Народны дэпутат».

Чарговы прыклад таго, што развянчанне культу асобы – пытанне даволі хуткае, нават імклівае. Наколькі я разумею, Назарбаеў і ягоная сям'я не адрозніваліся захаваннем казахстанскіх законаў, таму скасаваныя прынятыя за Елбасы законы і асобныя нормы не будзе ўспрынята чыноўнікамі і людзьмі негатыўна ў дачыненні да Такаева - яны звыклі да таго, што права і так было патаптанае, а яго значэнне знаходзілася пад падэшвай адміністрацыйна-сілавога кіравання.

Магчыма мы назіраем, як першыя лозунгі казахстанцаў - «Старычына, сыходзь!» (каз. - «Шал, кет!») плаўна пераходзяць у новы курс Такаева і ягонай каманды.

Зыходзячы з беларускіх рэалій, мне здаецца, што гэта новы выклік канстытуцыйным зменам, УНС і ўсяму астатняму. Калі ўлада не мае рэальнай падтрымкі большасці народа, чыноўнікаў і сілавога блока, калі адсутнічае сістэма стрымак і проціваг, няма незалежных галін улады, а замест гэтага выбудаваная вертыкаль, то сама гэтая вертыкаль у кожны момант можа пасыпацца хутчэй, чым будзе сказана «Шал, кет!»

Такое пачуццё, што Такаеў, калі ён не мае аўтарытарных амбіцый, хітра і спрытна выкарыстоўваў аўтакратаў Расеі і Беларусі, АДКБ, каб рассекчы казахстанскі вузел аўтарытарызму.