«Шмат злепак»: у Казахстане заўважылі дзівацтвы ў відэа Назарбаева

Дзе здымалі елбасы?

У Сеціве заўважылі дзівацтвы ў відэазвароце першага прэзідэнта Казахстана Нурсултана Назарбаева, які аб'явіўся ўпершыню з канца снежня.

Дыпфэйк ці галаграма?

Як піша factcheck.kz, да іх паступілі дзясяткі паведамленняў з сумневам: «ці не дыпфэйк гэта»?

Дыпфэйк – рэалістычная падмена фота-, аўдыё-і відэаматэрыялаў, створаная з дапамогай нейрасетак.

На сайце сцвярджаюць, што ў відэа ўсё ж не дыпфейк. І падалі такія довады:

«У дыпфейках часцей за ўсё адсутнічаюць склейкі, твар толькі ў анфас, Але на ўсялякі выпадак мы праверылі відэа з дапамогай спецыяльнага сэрвісу, які аналізуе відэа на выкарыстанне тэхналогій дыпфейку – імавернасць нікчэмная».

Спецыяліст у галаграмах з кампаніі HoloGroup Аляксандр Якубаў таксама не ўбачыў і прыкмет галаграмы ў відэазвароце.

Шмат мантажных злепак

У той жа час у factcheck.kz прымецілі, што ў відэа Назарбаева вельмі шмат мантажных злепак. Гэта можа казаць аб тым, што здымалі не ў адзін і не ў два дублі.

«Мантаж няроўны, але слядоў глыбокай апрацоўкі ці 3D-мадэлявання намі не выяўлена. Зноў жа, пры мадэляванні можна было б абысціся без злепак», - адзначылі спецыялісты.

Што за кабінет

Таксама ў тэлеграм-канале «Мілітарыст» напісалі, што, нягледзячы на сцягі Казахстана на фоне, «на відэа паслання Назарбаева народу бачны не яго асноўны кабінет адкуль ён вёў трансляцыі і прымаў гасцей».

Але мы знайшлі лістападаўскі зварот Назарбаева – і на ім, хутчэй за ўсё, усё ж такі самы кабінет. Хіба што слупкі са сцягамі павернуты па-іншаму.

Вось кабінет са звароту за 18 студзеня:

А вось за 12 лістапада:

За верасень таксама ёсць відэа з падобнага месца.

Як пішуць у factcheck.kz, геаграфічна гэта - бібліятэка елбасы ў сталіцы Казахстана. У сеціве ёсць фота з гэтага ж (ці выкананага ў ідэнтычным дызайне) кабінета ў Бібліятэцы, але толькі з іншым сталом:

"Я пенсіянер"

Нагадаем, на Youtube-канале першага прэзідэнта Казахстана Нурсултана Назарбаева, які знік у снежні, 18 студзеня з'явіўся яго відэазварот на казахскай і расейскай мовах. Ад пачатку пратэстаў у краіне было невядома, дзе ён і што з ім.

«Я ў 2019 годзе перадаў паўнамоцтвы Прэзідэнта Касым-Жамарту Такаеву і з таго часу з'яўляюся пенсіянерам, і цяпер знаходжуся на заслужаным адпачынку ў сталіцы Казахстана і нікуды не з'язджаў», - сказаў елбасы на відэа.

І дадаў: «Прэзідэнт Касым-Жамарт Такаеў валодае ўсёй паўнатой улады. Ён старшыня Рады бяспекі. Неўзабаве Прэзідэнт будзе абраны старшынём партыі «Nur Otan». Таму ніякага канфлікту ці супрацьстаяння ў эліце няма. Чуткі на гэтую тэму абсалютна беспадстаўныя».

Пры гэтым, калі ўсё ж запісана відэа — невядома. Але гэта сапраўды адбылося пасля пратэстаў, бо ён згадвае пра іх. А таксама кажа пра чуткі «аб супрацьстаянні эліт у Казахстане», якія таксама з'явіліся пасля яго «знікнення». І падкрэслівае «паўнату ўлады» цяперашняга прэзідэнта Казахстана Касыма-Жамарта Такаева.