Раналду апярэдзіў Мэсі ў спісе самых высокааплатных футбалістаў свету
- 21.09.2021, 18:49
- 2,408
Часопіс Forbes апублікаваў рэйтынг.
Часопіс Forbes апублікаваў рэйтынг самых высокааплатных футбалістаў 2021 года. Яго ўзначаліў форвард нацыянальнай каманды Партугаліі і «Манчэстар Юнайтэд» Крышціяну Раналду, які зрушыў з першага месца аргентынскага нападніка «Пары Сен-Жэрмен» Ліянэля Мэсі.
У летняе трансфернае акно абодва форварда змянілі клубы. Раналду перайшоў з «Ювентуса» у МЮ, а Мэсі - з «Барселоны» ў ПСЖ.
Forbes падлічыў, што заробак Раналду складзе ў гэтым сезоне $125 млн, з якіх $55 млн прыпадаюць на рэкламныя кантракты. Мэсі запрацуе $110 млн ($35 млн - ад рэкламы).
Далей у рэйтынгу самых высокааплатных футбалістаў размясціліся бразілец Неймар (ПСЖ, $95 млн), француз Кіліян Мбапе (ПСЖ, $43 млн), егіпцянін Махамед Салах («Ліверпуль», $41 млн), паляк Роберт Левандоўскі («Баварыя», $35 млн), гішпанец Андрэс Ін'еста («Вісел Кобе», $35 млн), француз Поль Погба (МЮ, $34 млн), валіец Гарэт Бэйл («Рэал», $32 млн) і бельгіец Эдэн Азар («Рэал», $29 мільёнаў).