Для беларусаў зноў падымаюць тарыфы на ЖКП: сталі вядомыя падрабязнасці

Ці адвяжуць рост кошту камунальных паслуг ад курсу даляра?

Тарыфы на жыллёва-камунальныя паслугі ў 2022 годзе, як і ў гэтым, плануюць павысіць у два этапы. Як чакаецца, іх рост адбудзецца з 1 студзеня і 1 чэрвеня, паведамілі ў МАРГ. Ва ўстанове таксама распавялі, ці будуць адыходзіць ад прывязкі да даляра пры павышэнні тарыфаў на жыллёва-камунальныя паслугі.

Журналіст zerkalo.io як фізасоба пацікавіўся ў МАРГ, ці плануецца на 2022 год падвышэнне тарыфаў на жыллёва-камунальныя паслугі.

- Як і сёлета, планавы рост тарыфаў на жыллёва-камунальныя паслугі, хутчэй за ўсё, будзе ў межах 5 даляраў (у разліку на тыпавую двухпакаёвую кватэру з трыма жыхарамі пры нарматыўным спажыванні імі паслуг. - Заўвага. Рэд.), - растлумачыў кіраўнік МАРГ Уладзімір Калтовіч. З ягоных слоў, канчатковая пастанова ў гэтым пытанні пакуль не прынятая, аднак плануецца, што тарыфы на ЖКП паднімуць у два этапы, як і сёлета, - з 1 студзеня і 1 чэрвеня.

Нагадаем, сёлета тарыфы на жыллёва-камунальныя паслугі паднялі з 1 студзеня на 4,2 даляра, сярод іншага падаражэлі паслугі ў тэхабслугоўванні і капрамонце жылых дамоў, газа-, электра- і водазабеспячэння, водаадвядзення. А з 1 чэрвеня на 0,8 даляра павялічылі тарыфы на паслугі цеплазабеспячэння для патрэб ацяплення і гарачага водазабеспячэння.

У 2019 і 2020 гадах тарыфы на ЖКП таксама планава павышалі ў два этапы - з пачатку года і 1 чэрвеня.

Ці адвяжуць рост тарыфаў на жыллёва-камунальныя паслугі ад курсу даляра

Раней чыноўнікі распавядалі, што маюць намер адмовіцца ад даляра ў разліку росту аплат за ЖКП і прывязаць іх да базавай адзінкі. Прапаноўвалася, што кожны год «камуналка» будзе падвышацца ў межах паловы базавай адзінкі. Цяпер базавая адзінка складае 29 рублёў, а яе палова, адпаведна, - 14,5 рубля.

Прывязка да рубля разглядалася як адзін з крокаў па дэдалярызацыі беларускай эканомікі.

Уладзімір Калтовіч паведаміў, што пакуль сыходзіць ад прывязкі да даляра пры падвышэнні тарыфаў на жыллёва-камунальныя паслугі не маюць намеру.