СМІ: Raiffeisen Bank праз санкцыі абмежаваў супрацоўніцтва з Беларусбанкам

Беларусбанк, Белаграпрамбанк і Белінвестбанк раней трапілі пад сектаральныя санкцыі ЕЗ.

Raiffeisen Bank International абмежаваў супрацоўніцтва з Беларусбанкам праз санкцыі супраць рэжыму Лукашэнкі, піша аўстрыйскае выданне Die Presse. Яно сцвярджае, што адна з найбуйнейшых аўстрыйскіх банкаўскіх групаў больш не будзе ажыццяўляць міжнародныя пераводы для беларускага дзяржбанка. Нагадаем, тры банкі – Беларусбанк, Белаграпрамбанк і Белінвестбанк – раней трапілі пад сектаральныя санкцыі ЕЗ.

«Адзіная заходнееўрапейская крэдытная арганізацыя ў Беларусі робіць першыя высновы з палітычнай сітуацыі ў краіне. У будучыні Raiffeisen Bank International больш не будзе ажыццяўляць міжнародныя пераводы для Беларусбанка», – піша аўстрыйскае выданне. Die Presse сцвярджае, што Raiffeisen Bank International абмежаваў супрацоўніцтва дзяржбанкаў праз санкцыі супраць Беларусі.

Пры гэтым банкаўская група Raiffeisen Bank International не выступала з заявамі пра магчымае спыненне ажыццяўлення міжнародных пераводаў для Беларусбанка. Дзяржбанк таксама не распаўсюджваў заявы на гэтую тэму.

Нагадаем, пад сектаральныя санкцыі ЕЗ, якія ўвялі ў другой палове чэрвеня, трапілі тры дзяржбанкі – Беларусбанк, Белінвестбанк і Белаграпрамбанк. Напярэдадні ўвядзення санкцый выданне Politico паведамляла, што Аўстрыя спрабуе змякчыць еўрапейскія санкцыі супраць Беларусі, выказаўшы нязгоду з некаторымі захадамі, накіраванымі на перакрыццё доступу беларускага боку да замежнай валюты.

У ліпені рэйтынгавае агенцтва Standard & Poor's пацвердзіла рэйтынгі двух банкаў, якія трапілі пад санкцыі, – Белаграпрамбанка, Беларусбанка, таксама банка БелВЭБ на ўзроўні В з негатыўным прагнозам.

Раней у апублікаваным 1 ліпеня аглядзе Raiffeisen Research датычна эканомікі Беларусі адзначалася, што ўплыў санкцый на яе стане відавочным да канца 2021 года. Эксперты зрабілі прагноз з высокімі чыннікамі нявызначанасці. «Аднаўленне беларускай эканомікі наўрад ці магчымае ў 2021 годзе, у першую чаргу праз высокую нявызначанасць, звязаную з нявызначанасцю практычнага ўжывання санкцый. Санкцыйны ціск можа прывесці да значнага пагаршэння сітуацыі ў прамысловым сектары, – адзначалася ў аглядзе. – Сукупнае ўздзеянне разгледжаных чыннікаў можа стварыць умовы для запаволення эканамічнага росту».