Кошты нафты вярнуліся да зніжэння
2- 3.08.2021, 19:48
- 3,332
Нафта ўпала на двухтыднёвае «дно» на навінах пра лакдаўн у Кітаі.
Рынак нафты прадаўжае падаць другі дзень запар на продажах буйных амерыканскіх фондаў.
На гандлі ў аўторак, 3 жніўня, кошт паўночнаморскага гатунку Brent упаў да мінімуму за два тыдні, а кошт амерыканскай нафты WTI прабіў адзнаку 70 даляраў за бараль, вышэй за якую з кароткімі перапынкамі трымаўся з пачатку лета, паведамляе finanz.ru.
На 18.02 паводле Менска кастрычніцкія ф'ючэрсы на Brent гандлююцца за 71,97 даляра за бочку, страчваючы ў кошце 1,3%, а раней апускаліся да адзнакі 71,05 даляра.
Кантракты на WTI на кастрычнік заключаюцца на 69,96 даляра за бараль. За дзень каціроўкі аселі на 1,8%, а з пачатку тыдня – на 5,4%.
Другі дзень запар сцэнар гандлю нафтай быццам напісаны пад капірку: млявыя ваганні на азіяцкай і еўрапейскай сесіі ператвараюцца ў рэзкае падзенне, калі адчыняюцца біржы ЗША.
Адначасова пачынаюць даражэць амерыканскія дзяржаўныя аблігацыі, сігналізуючы пра ператок капіталу з сыравінных актываў у ахоўныя. У аўторак прыбытковасць 10-гадовых treasuries падала да 1,169%.
Сыравінныя рынкі напалоханыя ўсплёскам Covid-19 у Кітаі, які хоць і нязначны паводле сусветных мерак, але страшны паводле наступстваў і адказу ўладаў.
Зафіксаваўшы больш за 300 новых выпадку заражэння за апошнія 10 дзён і атрымаўшы хранічны рост дзённага захворвання ў 15 правінцыях, кітайскі ўрад зноў уводзіць беспрэцэдэнтныя ў жорсткасці карантынныя захады, забараняючы жыхарам цэлых кварталаў выходзіць на вуліцу, калі ў іх раёне знойдзены хоць бы адзін носьбіт вірусу.
У Нанкіне, які стаў эпіцэнтрам новага ўсплёску, уведзены лакдаўн і зачынены аэрапорт. Жыхарам Пекіна рэкамендавана не пакідаць горад. Транспартныя зносіны сталіцы з 23 найбольш небяспечнымі рэгіёнамі спыненыя.
«Новы ўсплёск інфекцыі можа сцерці ў парашок 5% кароткатэрміновага попыту на нафту», – кажа даследнік Інстытута тэхналогій і эканомікі CNPC Ван Лінін.
Выніковы эфект на спажыванне будзе залежаць ад хуткасці распаўсюджвання вірусу і даўжыні эпізоду, дадае ён.
Адначасова расце захворванне на дэльта-штам у ЗША, дзе за мінулы дзень зафіксавалі 129 тысячаў новых выпадкаў інфекцыі. Пры гэтым сярэдняе значэнне паказніка за сем дзён пераўзыходзіць узроўні лета мінулага года. Улады Нью-Ёрка і іншых штатаў абавязалі жыхароў, у тым ліку вакцынаваных, выконваць маскавы рэжым у памяшканнях.
Цэнтр кантролю і прафілактыкі захворванняў ЗША тым часам афіцыйна папярэдзіў, што нават вакцынаваныя могуць распаўсюджваць вірус. А гэта значыць, што вяртанне да ранейшай мабільнасці – з адкрытымі межамі і вольнымі пералётамі – можа быць адкладзенае на няпэўны тэрмін.
Распрадаючы нафту, буйныя інвестары закрываюць стаўкі на рэфляцыю, якія ўтрымлівалі з мінулага года, калі сусветныя цэнтрабанкі запусцілі на беспрэцэдэнтную магутнасць друкарскія станкі, – гэты трэнд відаць на многіх сыравінных рынках, у тым ліку ў металах, паказвае стратэг ING Вэнью Яа.