«Упэўненая, што ён не мог учыніць самагубства»
9- 3.08.2021, 15:18
- 14,042
Дзяўчына Віталя Шышова распавяла, як ён сябе паводзіў напярэдадні трагедыі.
Дзяўчына кіраўніка Беларускага дома ва Украіне , якога сёння знайшлі засіленым у кіеўскім парку, распавяла, як Віталь сябе паводзіў напярэдадні трагедыі, паведамляе «Радыё Свабода».
Бажэна Жолудзь, як і Віталь, з Рэчыцы, яны разам пераехалі ў Кіеў увосень 2020 года праз пераслед беларускімі ўладамі.
- У Віталя не было бацькоў і сям'і - усе памерлі. Працаваў ён ІТ-фрылансерам. Не было такога, каб ён скардзіўся, што за ім сочаць. Але апошнім часам Віталь стаў больш уважлівым - бывала, глядзеў, што за аўто пад'ехалі, хто з іх выходзіць.
Наўпроставых пагроз Віталю не паступала, але ў яго было дрэннае прадчуванне. Мне ён яго не выказваў, але аднаму нашаму знаёмаму пісаў за тыдзень да трагедыі: у мяне дрэннае прадчуванне, калі што, прыглядзі за Бажэнай. Каб канкрэтна незнаёмцы падыходзілі да Віталя - такога не было.
Да мяне аднойчы на вуліцы ў цэнтры горада падыходзілі нейкія людзі - як потым высветлілася, запісвалі і здымалі.
Мы абодва хварэлі з тыдзень, ляжалі ў ложках, глядзелі фільмы. Вядома, настрой у хворага чалавека не надта добры, але ніякіх дурных думак у Віталя не было. Упэўненая, што ён не мог учыніць самагубства. У яго не было для гэтага падстаў. І так са мной ён зрабіць не мог. У нас былі супольныя планы на будучыню, - распавяла Бажэна.