Дзяржсакратар ЗША: Лукашэнка парушыў асноўныя правы Ціманоўскай
4- 3.08.2021, 10:04
- 11,448
ФОТА: REUTERS
Энтані Блінкен выступіў з цвёрдай заявай пра сітуацыю ў Токіё.
"Прымушаючы ўдзельніцу Алімпіяды Крысціну Ціманоўскую да ад'езду толькі за тое, што яна свабодна выказала сваё меркаванне, рэжым Лукашэнкі паспрабаваў учыніць чарговы акт міжнародных рэпрэсій", - напісаў у аўторак, 3 жніўня кіраўнік Дзярждэпу ЗША Энтані Блінкен на сваёй старонцы ў сацсетцы Twitter.
На думку дзяржсакратара ЗША, такія ўчынкі парушаюць алімпійскі дух, з'яўляюцца нападам на асноўныя правы і недапушчальныя.
The Lukashenka regime sought to commit another act of transnational repression: attempting to force Olympian Krystsyna Tsimanouskaya to leave simply for exercising free speech. Such actions violate the Olympic spirit, are an affront to basic rights, and cannot be tolerated.
— Secretary Antony Blinken (@SecBlinken) August 3, 2021
Раней прадстаўніца МЗС Нямеччыны Марыя Адэбар (Maria Adebahr), каментуючы сітуацыю вакол Ціманоўскай, заклікала беларускія ўлады "паважаць асноўныя дэмакратычныя правы, уключаючы свабоду СМІ, прэсы і свабоду меркаванняў". "Гэта тычыцца кожнага грамадзяніна Беларусі і, вядома ж, спартоўцаў і спартовак", - падкрэсліла Адэбар, размаўляючы з журналістамі 2 жніўня.
Прымус Ціманоўскай да ад'езду з Алімпіяды
1 жніўня 24-гадовая бягуха Крысціна Ціманоўская, якая прадстаўляе Беларусь на XXXII Алімпійскіх гульнях у Токіё, апублікавала відэаролік, у якім заявіла, што беларускія ўлады прымушаюць яе сілай пакінуць Японію і вярнуцца на радзіму ў сувязі з выказанай ёю крытыкай на адрас беларускіх спартыўных функцыянераў.
2 жніўня стала вядома, што Польшча выдала спартоўцы гуманітарную візу, якую тая атрымала ў амбасадзе краіны ў Токіё.
