З беларускіх крамаў знікла папулярнае дзіцячае малако

Магчыма, справа ў санкцыях.

Вядомае дзіцячае малако вытворчасці Менскага малочнага завода №1 практычна знікла з паліц крам. Прадаўцы разводзяць рукамі і кажуць, што ўжо месяц яго не пастаўляюць. Onliner спытаў у вытворцы, куды падзеліся сінія ўпакоўкі з трусам і ці чакаць іх зноў у продажы.

- У Менску склалася вельмі сумная сітуацыя з дзіцячым малаком «Дэпі». Яго не тое што на тры дні не стае, а часта ўжо да вечара можа не быць. Ніякага. Зусім, - кажа чытачка. - Пры гэтым, падобна, гэта не залежыць ад крамы сеткі. Я шукала яго ў «Віталюры», ProStore, «Еўраопце» ў розных лакацыях Менска. Нідзе няма!

Мяркуючы з усяго, праблема назіраецца ўвесь апошні месяц.

- Я ўжо амаль месяца не магу знайсці гэта малако і не разумею, ці чакаць яго зноў. Бо паводле закона подласці ўсё самае лепшае рана ці позна здымаюць з вытворчасці. А маё дзіця яго вельмі любіць, і ў яго вельмі зручная ўпакоўка для прагулак. Але цяпер гэтага малака наогул ні ў адной краме няма, - скардзіцца Валянціна.

Журналісты прайшліся па крамах і праверылі: сапраўды, у продажы ёсць кефір і малочныя кактэйлі «Дэпі», але малака не знайсці.

- У нас яго няма ўжо прыкладна месяц - не пастаўляюць. Чула, што на заводзе зламалася вытворчая лінія ці нешта такое, - тлумачыць прадавец крамы «Суседзі» ў Малінаўцы.

Што кажа вытворца?

На Менскім малочным заводзе №1 распавялі, што панеслі вялікія страты праз невыкананне дамоўных абавязанняў з крамамі. Прычына ж адсутнасці малака ў тым, што еўрапейскі пастаўшчык упакоўкі не прывёз патрэбны аб'ём.

- Праблемы ўзніклі з сярэдзіны месяца праз тое, што прадукцыя імпартаваная, асноўны вытворца ўпакоўкі - Італія, - тлумачыць намеснік гендырэктара вытворчасці Міхаіл Снапкоў. - Але да санкцый гэта ніякага дачынення не мае. Проста фірма не паспела вырабіць патрэбны аб'ём упакоўкі, бо акрамя гэтага яна займаецца яшчэ вырабам абсталявання. Пастаўшчык еўрапейскі, там яшчэ шмат пытанняў па растаможцы і лагістыцы. Так як малако запатрабаванае больш, упаковачны матэрыял быў выкарыстаны раней, а што тычыцца кактэйляў, то яны менш запатрабаваныя, і мы вырабляем іх толькі на заяўкі гандлёвых арганізацый.

На малаказаводзе запэўніваюць, што дзіцячае малако зусім хутка зноў з'явіцца ў продажы.

- Як дзяржпрадпрыемства, мы ўсё заказваем з дапамогай тэндару. Гэты пастаўшчык пакавальнага матэрыялу выйграў тэндар, так што мы будзем працягваць з ім працаваць і далей. Малако з'явіцца ў продажы ўжо ў пачатку жніўня, - абяцае Міхаіл Снапкоў.