Белстат зноў засакрэціў статыстыку што да смяротнасці

На што часцей за ўсё хварэюць беларусы?

Белстат апублікаваў свежы зборнік «Сацыяльнае становішча і ўзровень жыцця насельніцтва Рэспублікі Беларусь», у якім ёсць звесткі, колькі беларусаў і на што хварэлі летась, піша zerkalo.io.

Большая частка захворванняў з упершыню ўстаноўленым дыягназам прыпадае на хваробы органаў дыхання. І іх колькасць у параўнанні з 2019 годам значна ўзрасла. Пры гэтым у зборніку не выявілася звестак аб смяротнасці, хоць раней іх размяшчалі.

У 2020 годзе ў Беларусі зарэгістравалі больш за 8,648 мільёна выпадкаў захворванняў з упершыню пастаўленым дыягназам. Гэта амаль на 600 тысяч выпадкаў больш, чым летась і на 900 - чым у 2015-м. Большая частка з іх прыпадае на хваробы органаў дыхання - больш за 4,7 мільёна выпадкаў. Калі параўноўваць гэты паказчык з 2019 годам, то ён выявіцца большым на 686,5 тысячы. Калі параўнаць паказчыкі 2019 і 2015 гадоў, то там розніца зусім невялікая: у 2015 годзе выпадкаў было на 9,1 тысячы больш. Лічбы выраслі на фоне пандэміі каранавіруса, якая дабралася да Беларусі вясной 2020 года.

Нагадаем, паводле звестак Міністэрства аховы здароўя, на 29 ліпеня ў краіне налічвалася 443 864 пацверджаныя выпадкі каранавіруснай інфекцыі. Гэта значыць, гэты паказчык крыху меншы, чым за 1,5 года.

Калі казаць пра іншыя хваробы, то лічбы значна выраслі ў захворванні на некаторыя інфекцыйныя і паразітарныя хваробы - больш чым удыая. У 2019 годзе было зарэгістравана 308,7 тысячы выпадкаў, а ў мінулым - 627,4 тысячы.

У некаторых іншых групах захворванняў паказчыкі летась знізіліся. Згодна са зборнікам Белстата, беларусы менш, чым у пазамінулым годзе, пакутавалі ад хвароб эндакрыннай сістэмы, хвароб крыві, псіхічных разладаў, хвароб нервовай сістэмы, органаў зроку, слыху, стрававання, мочапалавой сістэмы, скуры, касцёва-мышачнай сістэмы, прыроджаных анамалій. Таксама было зафіксавана менш траўмаў і атручэнняў.

У параўнанні з 2019 годам у мінулым было выяўлена менш выпадкаў новаўтварэнняў: 128,7 тысячы супраць 154,6 (на 25,9 тысячы менш).

Аднак анколагі звязваюць зніжэнне з пандэміяй каранавіруса.

- Гэта значнае зніжэнне не абумоўленае нейкімі поспехамі медыцыны, а звязанае з пандэміяй кавід-інфекцыі, - тлумачыў 2 лютага падчас прэс-канферэнцыі Сяргей Красны, намеснік дырэктара ў навуковай рабоце РНПЦ анкалогіі і медыцынскай радыялогіі. - Людзі менш звяртаюцца, асабліва калі іх нічога не турбуе. Прытармазіліся праграмы скрынінга злаякасных новаўтварэнняў. Спадзяемся, што ўжо ў канцы вясны гэтыя праграмы актывізуюцца і летам будуць абследаваныя тыя, хто не змог зрабіць гэта падчас пандэміі.

Варта таксама нагадаць, што статыстыку смяротнасці і яе прычыны за 2020 год Белстат так і не апублікаваў. Апошнія звесткі былі апублікаваныя за першы квартал мінулага года.