Беларускі «Вольны хор» спявае ў Каралеўскім замку ў Варшаве

Трансляцыя.

29 ліпеня «Вольны хор» выступае з жывым канцэртам у садах Каралеўскага замка Варшавы. Канцэрт прысвечаны Марыі Калеснікавай. Пачатак анлайну а 19:30 паводле беларускага часу.

У Каралеўскім замку ў Варшаве выступае легендарны «Вольны хор». Артысты ўжо выступалі раней у Бэрліне, Уроцлаве, Познані. Варшаўскі канцэрт прысвечаны Марыі Калеснікавай.

«Вольны хор» узнік у жніўні летась. Са слоў артыстаў, «Вольны хор» стаў рэакцыяй на палітычныя падзеі ў краіне. Хор нечакана з'яўляўся ў публічных месцах Менску - у метро, на вакзале, у оперным тэатры, бібліятэцы, у філармоніі, у гандлёвых цэнтрах, мемарыяле «Яма» - і выконваў кампазіцыі, якія сталі асабліва папулярнымі падчас беларускіх пратэстаў. Ён таксама ўдзельнічаў у дваровых канцэртах у Менску.

«Гэта аб'яднанне музыкаў, якія не могуць маўчаць, для якіх спевы і песні - гэта сродак выказванні сваёй пазіцыі», - кажуць пра сябе артысты.