На беларускай мяжы ўводзяць абавязковую платную працэдуру

Хто адмовіцца аплаціць, таго не будуць пускаць у краіну.

Ужо з 1 ліпеня ў пункце пропуску «Новая Гута» на мяжы з Украінай пачнуць дэзынфекаваць увесь транспарт, што заязджае. Паслуга платная. Адмовіцца можна, але тады не ўпусцяць у Беларусь. Нарэшце апублікавалі дакумент, які апісвае працэс праходжання дэзынфекцыі, паведамляе onliner.by.

Эксперымент для пачатку запланаваны на 1 ліпеня – 1 кастрычніка. Названая мэта – прадухіленне распаўсюджвання заразных хваробаў чалавека і жывёлаў. Новае правіла распаўсюджваецца на легкавыя і грузавыя машыны, а таксама аўтобусы, як беларускія, так і замежныя.

Контрмаркі

Ва ўказе прапісана: у выпадку адмовы кіроўцы (уладальніка) ад дэзынфекцыі ТС не будзе дапушчаны на тэрыторыю Беларусі ў «Новай Гуце». Непасрэдна паслугу прапануюць ТАА «БелГлобалГарант» на падставе дамоваў, якія заключаюцца. Дамова будзе ўважацца падпісанай у належнай форме з дня набыцця кантрольнай маркі, якую трэба прад'явіць кіроўцам або уладальнікам ТС у пункце пропуску пры ўездзе ў Беларусь. Месцы продажу марак будуць размешчаныя на пункце пропуску. Выглядаць контрмаркі будуць наступным чынам:

Пры ўездзе ў РБ кіроўцу або ўладальніку ТС неабходна паказаць контрмарку памежніку. Той, у сваю чаргу, правярае наяўнасць і цэласнасць кантрольнай маркі, парушае яе цэласнасць і вяртае прад'яўніку. Так пазначана ў пастанове Саўміна.

Пасля выхаду нататкі ў Дзяржпамежкамітэце ўдакладнілі: спачатку кіроўца павінен набыць контрмарку, потым пад'ехаць да памежнікаў для кантролю. Калі маркі няма, транспартны сродак не мае быць увезены ў РБ. Калі марка ёсць – спачатку зноў жа кантроль, потым кіроўцу накіруюць да месца дэзынфекцыі, якое будзе размешчанае за межамі тэрыторыі пункту пропуску.

Дапоўнена. Працэс апрацоўкі

За тыдзень да старту эксперыменту Мінсельгас апублікавала інструкцыю. Прывядзём самыя важныя вытрымкі з яе.

Будуць устаноўленыя дэзбар'еры розных памераў, перад імі – інфармацыйныя стэнды з звесткамі пра габарыты ТС, хуткасць руху, час і месца, калі кіроўца павінен уключыць сістэму вентыляцыі.

Пры правядзенні дэзынфекцыі ажыццяўляецца апрацоўка ўсіх вонкавых паверхняў ТС. Выкарыстоўваецца дэзсродак, дазволены да ўжывання ў РБ.

Перад праходжаннем праз дэзбар'ер кіроўца выключае сістэму вентыляцыі і кандыцыянавання ў салоне, зачыняе вокны і дзверы.

Пры правядзенні дэзынфекцыі кіроўца і пасажыры не выходзяць з ТС.

Пры праходжанні ТС праз дэзбар'ер дэзынфекцыйнае абсталяванне актывуецца і адключаецца ў аўтаматычным рэжыме.

Сістэма вентыляцыі і кандыцыянавання можа быць прыведзеная ў дзеянне пры выездзе з дэзбар'еру пасля перасячэння адпаведнага інфармацыйнага стэнда.

У выпадку вымушанага спынення транспартнага сродку пад дэзбар'ерам аператар спыняе дэзынфекцыю і здзяйсняе захады для ліквідацыі перашкодаў у працы дэзбар'еру.

Кіроўца негабарытных ТС спыняецца да ўезду ў дэзбар'ер і паведамляе аператару пра прыбыццё. Аператар накіроўвае яго ў спецыяльны дадатковы праезд, дзе ажыццяўляе дэзынфекцыю дна – у аўтарэжыме, астатняга кузава – у ручным.

Вынікі эксперыменту мяркуецца прааналізаваць да 1 лістапада і ўнесці прапановы аб абавязковай дэзынфекцыі ў іншых пунктах пропуску.