У Беларусі зноў падаражэла паліва

За год бензін вырас на 10% і больш.

У Беларусі зноў даражэе паліва. Гэта будзе 18 раз з пачатку 2021 года. І зноў на капейку. Такім чынам, бензін вырас у Беларусі на 10% і больш.

«З улікам маніторынгу сітуацыі на рынку нафты і сумежных рынках нафтапрадуктаў і ў адпаведнасці з прынятай канцэрнам стратэгіяй стрыманай індэксацыі коштаў маторнага паліва лімітавы ўзровень раздробных коштаў на АЗС змяняецца з 24 чэрвеня 2021 г.», – так у дзяржманапалісце «Белнафтахім» патлумачылі чарговае павышэнне коштаў аўтамабільнага паліва.

Новыя кошты паліва:

АІ-92-К5-Еўра – 1,88 рубля,

АІ-95-К5-Еўра – 1,98 рубля,

АІ-98-К5-Еўра – 2,20 рубля,

Дызельнае паліва – 1,98 рубля.

Варта адзначыць, што апошні раз паліва даражэла 15 чэрвеня.