«Выпускны надумалі адзначыць сціпла - па 400 рублёў з чалавека»
46- 7.05.2021, 12:23
- 20,544
План адміністрацыі менскай школы моцна здзівіў і збянтэжыў бацькоў.
У рамках спецпраект «Адваротны бок медаля» бацькі выпускнікоў распавялі «Салiдарнасцi», колькі ім каштавацьме выпускная пагулянка.
Навучальныя ўстановы актыўна рыхтуюцца адправіць старшакласнікаў у дарослае жыццё. Аднак для бацькоў гэта не самы танны працэс.
- Яшчэ на сходзе дамовіліся, што выпускны будзем адзначаць сціпла, - распавялі бацькі старшакласніка адной з навучальных устаноў Менска. - Урэшце, жыццё на школе не заканчваецца. Грошы патрэбныя і для вучобы, і для рэпетытараў. Таму надумалі не шыкаваць.
Аднак якое ж было здзіўленне бацькоў, калі праз некалькі дзён ім прыйшло паведамленне, што трэба сабраць і перадаць для закупкі ніжэй прапісаныя сумы:
«1. Арганізацыйна-віншавальны блок «Апошняя лінейка» (віншавальная прадукцыя вучням, настаўнікам, запрашальныя білеты, кветкі...) 60 рублёў,
2. Падарунак ад выпуску 2021 гады - 70 рублёў».
Другі пункт моцна збянтэжыў бацькоў, якія і так рэгулярна кожныя паўгода пералічвалі сумы ў апякунскую раду на патрэбы ўстановы. Паведамлялася, што «падарунак» ад выпуску будзе «звязаны з неабходнасцю ліквідаваць патрабаванні МНС у пажарнай бяспецы», а менавіта замену панэляў МДФ.
- Вось такі памятны падарунак ад выпускнікоў! Прычым сказалі, што яго лепш аплаціць гатоўкай, - распавядаюць бацькі.
Але гэта толькі пачатак. Неўзабаве прыйшлі расцэнкі і на сам выпускны. Варыянтаў было два: зняць залу ў Доме афіцэраў за 85$ ці застацца святкаваць у самой навучальнай установе за 60$.
Асобна варта было аплаціць харчаванне - яшчэ па 50 рублёў з чалавека.
- Шчыра кажучы, нашы дзеці ад такіх варыянтаў былі не ў захапленні. Сядзець у навучальнай установе, куды і так кожны дзень ходзіш, даволі дзіўна. Яшчэ больш дзіўна святкаваць выпускны ў Доме афіцэраў. Казалі: ды лепш мы ў піцэрыю з класам сходзім і без усялякіх «праблем».
Дарэчы, пра разыначкі. Арганізатары выпускнога ўсё ж надумалі не эканоміць. У меню брусчэта з пастрамой і апенькамі, тарталетка з французскім жульенам...
Што да самога фармату выпускнога, то і тут падышлі з размахам. Чырвоная дарожка, квадракоптэр, святлодыёднае і ілюзіён-шоў, сэлфі-спінэр (з бліскаўкамі і паветранадзімалкай).
- Нават каляровы дым на досвітку абяцалі, - адзначаюць бацькі.
На пытанне, чаму яны не адмовіліся ад такога фармату, кажуць, што пастанова прымалася калегіяльна бацькамі усіх выпускных класаў. Прынамсі, так ім было абвешчана.
- Таму атрымліваецца: альбо тваё дзіця ідзе на выпускны разам з усімі, альбо сядзіць дома, - тлумачаць яны. - Вядома, не будзеш псаваць свята ўласнаму дзіцяці. Хочаш-не хочаш, а вымушаны раскашэліцца.
Але і гэта яшчэ не ўсе выдаткі. Неўзабаве прыйшла новая вестка: на выпускны альбом збіраюць яшчэ па 70 рублёў.
Гэта значыць агулам нашым суразмоўцам давядзецца выкласці за выпускны блізу 400 рублёў. І гэта не лічачы ўборы і іншыя спадарожныя выдаткі.
- Шчыра кажучы, мы да апошняга былі ўпэўненыя, што гэта ў нашай навучальнай установе надумалі шыкануць. Аднак, пагаварыўшы з бацькамі іншых школьнікаў, высветлілася, што мы напраўду святкуем у эканом-рэжыме, - распавядаюць суразмоўцы «Салiдарнасцi». - У суседняй школе, напрыклад, на выпускны здаюць па 600 рублёў. А ў дачкі маёй сяброўкі наогул сабраліся адзначаць з лімузінам і саўнай.