Даляр на гэтым тыдні абнавіў гістарычны максімум

Экспэрт пра тое, што будзе далей на валютным рынку.

На гэтым тыдні ў сераду даляр абнавіў гістарычны максімум - курс падымаўся да 2,6676 рубля. Нягледзячы на гэта, паводле вынікаў тыдня беларускі рубель умацаваўся ў адносінах да валютнага кошыку, гэтаму паспрыяла падзенне расейскага рубля. Tut.by спытаў у экспэрта, як могуць развівацца падзеі на валютным рынку на наступным тыдні.

Старэйшы аналітык «Альпары Еўразія» Вадзім Іосуб адзначае, што на наш валютны рынак на працягу гэтага тыдня актыўна ўплывалі падзеі, якія адбываліся на знешніх валютных рынках.

- Тут можна адзначыць два асноўныя фактары. Першы - рост еўра. За тыдзень пара еўра/даляр вырасла з 1,1780 да 1,1900, ці на 1%. Другі важны фактар - гэта зніжэнне расейскага рубля да замежных валют. За тыдзень даляр у Расеі падаражэў на 1,2%, еўра падняўся на 2,2%. Свайго лакальнага мінімуму расейскі рубель дасягнуў роўна ў сярэдзіне тыдня, калі курс і еўра, і даляра ў адносінах да яго вярнуліся да значэнняў, якія ў апошні раз былі ў пачатку лістапада летась. Звязана гэта падзенне расейскага рубля было з эскалацыяй сітуацыі на ўсходзе Украіны і з чаканнямі новых антырасейскіх санкцый. У выніку замежныя інвестары пазбаўляліся ад расейскага рубля, і, адпаведна, ён актыўна падаў. Менавіта тады курс даляра да беларускага рубля дасягнуў свайго гістарычнага максімуму, - кажа экспэрт.

Да канца тыдня расейскі рубель крыху адступіў ад мінімумаў серады, таму часткова аднавіўся і беларускі рубель.

- Некаторую загадку ўяўляюць таргі, якія прайшлі ў пятніцу: актыўна падалі ўсе тры замежныя валюты да беларускага рубля. Усе яны страцілі ў кошце падчас таргоў больш чым 0,5%. Пры гэтым аб'ём таргоў быў невялікім, больш чым удвая ніжэйшы за сярэднядзённы аб'ём таргоў. Гэта значыць прадаўцоў не шмат, але пакупнікоў валюты было яшчэ менш чым звычайна, - тлумачыць Вадзім Іосуб. - Звычайна ў такой сітуацыі Нацыянальны банк купляе лішкі валюты. Можна меркаваць, што ён наважыў не ўмешвацца, не купляць гэтыя лішкі і даць замежным валютам упасці.

Нягледзячы на такую актыўную дынаміку ўнутры тыдня і новы гістарычны максімум па курсе даляра, экспэрт звяртае ўвагу на тое, што беларускі рубель паводле вынікаў тыдня ўмацаваўся.

- Даляр за тыдзень вырас на 0,09%, еўра падаражэў на 1,12%, а расейскі рубель патаннеў на 1,11%. З улікам той долі, якую расейскі рубель займае ў нашым кошыку валют - гэта 50%, яго зніжэнне сцягнула кошт кошыка ўніз. Ён знізіўся на 0,31%, - кажа Вадзім Іосуб. - Калі казаць пра наступны тыдзень, то, хутчэй за ўсё, на курсы валют працягнуць аказваць уплыў у асноўным знешнія фактары. Можна зыходзіць з таго, што еўра працягне ўмацаванне да даляра. Калі сітуацыя вакол усходу Украіны не разрадзіцца, то можа працягнуць зніжацца расейскі рубель. Пры гэтым курс даляра да беларускага рубля, хутчэй за ўсё, моцна не зменіцца. Да канца наступнага тыдня, я думаю, даляр будзе ў дыяпазоне 2,62-2,67 рубля, еўра пры гэтым сцэнары ўмацуецца і будзе ў дыяпазоне 3,15-3,21 рубля, а расейскі рубель можа знізіцца і канец тыдня сустрэць у дыяпазоне 3,36-3,43 беларускага рубля 100 расейскіх.