Леаніда Барткевіча пахаваюць на Усходніх могілках у Менску
- 13.04.2021, 20:13
- 10,518
Развітанне з «песняром» адбудзецца 15 красавіка.
Развітанне з заслужаным артыстам БССР, адным з удзельнікаў ансамбля «Песняры» Леанідам Барткевічам адбудзецца 15 красавіка ў Менску, у Белдзяржфілармоніі.
Барткевіч памёр 13 красавіка ў Менску на 72-м годзе жыцця.
Цырымонія развітання пройдзе з 10:00 да 13:00. Потым адбудзецца пахаванне на Усходніх (Маскоўскіх) могілках сталіцы, паведаміў БелаПАН музыка і калега Барткевіча ў «Песнярах» Вадзім Касенка.
Паводле ягоных словаў, Барткевіч пакутаваў на цукровы дыябет, і ў апошні час стан ягонага здароўя пагоршыўся – чатыры дні таму артыста на «хуткай» забралі ў лякарню.
«Арганізм не вытрымаў, і, на жаль, нашага Леаніда Леанідавіча не стала», – сказаў Касенка.
На Усходніх могілках пахаваныя заснавальнік «Песняроў» Уладзімір Мулявін, а таксама кампазітар, у 1990-я музычны кіраўнік ВІА Алег Моўчан.