Ізраіль назваў дату адкрыцця межаў для першых замежных турыстаў

На першым этапе пускаць будуць невялікія групы ў адпаведнасці з усталяванай квотай.

Ізраіль адкрые межы для вакцынаваных і перахварэлых на COVID-19 турыстаў з 23 траўня 2021 года.

Пра гэтае рашэнне ад 13 красавіка паведаміла прэс-служба Міністэрства турызму Ізраіля, піша сайт unian.net.

Адзначаецца, што на першым этапе пускаць будуць невялікія групы турыстаў у адпаведнасці з усталяванай квотай. Пасля аналізу першых вынікаў будзе вывучана магчымасць павелічэння турыстычнага патоку і допуску індывідуальных падарожнікаў.

Пры гэтым турысты павінны будуць прайсці ПЦР-тэст перад пасадкай на рэйс, а таксама паўтарыць працэдуру і зрабіць сералагічныя тэсты для пацвярджэння наяўнасці антыцелаў па прыбыцці ў аэрапорт Бэн-Гурыён.

У той жа час Ізраіль мае намер весці перамовы з іншымі краінамі аб сумесным прызнанні сведчанняў пра вакцынацыю, каб выключыць неабходнасць у сералагічным даследаванні па прылёце.

«Дзяржаве Ізраіль пара скарыстацца сваёй перавагай як бяспечнай і імунізаванай дзяржавы, каб умацаваць сваю ўласную эканоміку. Цэлыя кірункі індустрыі турызму, уключаючы гідаў, гатэлі і транспартныя кампаніі залежаць ад уязнога турызму і не працуюць больш за год. Я шчаслівая даць старт працэсу аднаўлення іх дзейнасці і спадзяюся, што гэта паставіць галіну на шлях аднаўлення і поўнага вяртання да стабільнага і здаровага турызму ў Ізраілі», - пракаментавала міністр турызму Ізраіля Орыт Фаркаш Ха-Коэн.

Адзначым, пры гэтым пакуль не паведамляецца, аб грамадзянах якіх менавіта краін ідзе гаворка і, галоўнае, якія вакцыны Ізраіль будзе прызнаваць сапраўднымі.