Турцыя прадасць кітайцам мост праз Басфор

Шэсць кампаній з КНР купяць аўтатрасу разам з мостам за $700 мільёнаў.

Шэсць кітайскіх кампаній плануюць неўзабаве падпісаць дамову аб набыцці 51% аператара буйной турэцкай аўтатрасы і трэцяга моста праз праліў Басфор. Пра гэта са спасылкай на крыніцы паведамляе ў панядзелак тэлеканал «Хабер Цюрк», піша finanz.ru.

Гаворка ідзе аб продажы Паўночнай акруговай аўтадарогі і моста імя Явуза Султана Селіма, якія пабудаваў кансорцыум ICA. У яго ўваходзілі турэцкая кампанія IC İctas İnsaat ды італійская Astaldi, якая надалей выйшла з кансорцыума, перадаўшы сваю дзель акцый турэцкай старане. Траса пракладзеная з Паўднёвага Усходу Стамбула да раёна Башакшехір у яго паўднёва-заходняй частцы праз Прычарноморскую поўнач правінцыі Стамбул. Сума ўгоды складзе блізу 700 млн даляраў.

Кітайскія кампаніі стварылі фонд для рэалізацыі ўгоды. У яго ўвайшлі China Merchants Expressway, CMU, Zheijiang Expressway, Jiangsu Expressway, Sichuan Expressway і Anhui Expressway. Перамовы пачаліся яшчэ ў 2019 годзе, але праз пандэмію каранавіруса іх не паспелі закончыць. Зараз, як адзначае «Хабер Цюрк», стораны выйшлі на этап падпісання дамовы, што пацвердзілі тэлеканалу блізкія да IC İctas İnsaat крыніцы.

Мост Явуза Султана Селіма быў адкрыты 26 жніўня 2016 года. Па ім пракладзена восем аўтамабільных палос па чатыры ў кожную з бакоў і дзве чыгуначныя лініі. Агульны кошт работ з улікам інфраструктуры, кампенсацыйнага азелянення тэрыторыі склаў каля шасці млрд даляраў. Праект прадугледжваў будаўніцтва трас, якія і сфармавалі Паўночную акруговую дарогу.

Праезд па трасе і мосце платны, у сувязі з чым уладальнік гарантуе новым удзельнікам пэўную загружанасць і колькасць адзінак транспарту, які карыстаецца менавіта гэтым маршрутам.