У Купалаўскім трэцім разам абвясцілі аб наборы актораў

Што адбываецца ў тэатры?

Купалаўскі тэатр абвясціў аб новым конкурсным наборы актораў, які адбудзецца 25 траўня. Інфармацыя пра гэта з'явілася на афіцыйным сайце калектыву, піша tut.by.

Гэта ўжо трэцяя спроба набраць актораў для трупы.

Першая мела месца яшчэ ў лістападзе 2020 года. Сваіх студэнтаў на яго накіравала Зінаіда Пасюціна, прафесар кафедры тэатральнай творчасці Універсітэта культуры (БДУКМ). Таксама на пробах прысутнічалі студэнты іншых курсаў, а таксама з Бабруйска, Гомеля, Маладзечна.

Гэта праслухоўванне прайшлі пяць студэнтаў Пасюцінай: Ілля Крук, Станіслаў Арцем'еў, Святлана Гулевіч, Маргарыта Гарбачова і Надзея Азаранка. Таксама па выніках адбору для працы ў Купалаўскім рэкамендавалі Насту Варанкову, студэнтку другога курсу БДУКМ, і Васіля Сушыцкага, які раней працаваў у Моладзевым тэатры, пазней граў у серыялах. Усе яны выйшлі на сцэну ў спектаклі «Паўлінка», паказ якога адбыўся ў пачатку сакавіка 2021-га.

Другі конкурсны адбор адбыўся 24 сакавіка. Як паведамлялася на сайце тэатра, па яго выніках «акторская трупа Тэатр папоўнілася новымі імёнамі». Але іх імёны дагэтуль не вядомыя.

Цяпер абвешчана аб правядзенні новага набору.

Што да працы тэатра, то на яго сайце ўжо з'явілася афіша на травень. У ёй па-ранейшаму два спектаклі – згаданая вышэй «Паўлінка», а таксама «Вечар». Гэты спектакль яшчэ ў 2006 годзе паставіў рэжысёр Валерый Раеўскі. Пастаноўку таксама аднавілі ў сакавіку гэтага года. Праўда, у адрозненне ад «Паўлінкі», гэта было зрабіць куды прасцей. У пастаноўцы ўсяго тры выканаўцы. Дзве ролі граюць акторы, тыя, што засталіся ў трупе пасля жнівеньскіх падзей. На трэцюю ўвялі Васіля Сушыцкага.

Таксама 31 сакавіка з тэатра быў звольнены прэс-сакратар Мікалай Заяц. У загадзе аб ягоным звальненні ўказаная прычына гэтага: «У сувязі з прыёмам на працу работніка, для якога гэтая праца будзе з'яўляцца асноўнай» (Заяц працаваў у тэатры на паўстаўкі). Але інфармацыя аб новым прэс-сакратары на сайце тэатра дагэтуль адсутнічае.