Пад Менскам прадаюць надзел пад лецішча проста на балоце

У садовых таварыствах Менскага раёна 7 траўня з аўкцыёну прададуць 13 надзелаў.

Усе зямельныя надзелы знаходзяцца ў межах 30 кіламетраў ад МКАД, стартавыя цэны лотаў вар'ююцца ад 4 да 5,5 тысячы рублёў, адзначае realt.by. Цікава, што адзін з пляцаў размешчаны проста на балоце. Або на занадта вільготнай мясцовасці.

Надзел №285 у садовым таварыстве «Наш крыніца плюс» ужо не раз удзельнічаў у аўкцыёне, але дагэтуль застаецца вакантным, піша the-village.me. Прычына: на пляцоўцы ўвесь час стаіць вада. Зрэшты, на надзелах злева і справа ўладальнікі неяк змаглі пабудавацца.

Гэта будзе самы танны лот, які разыграюць 7 траўня: таргі за пляц пачнуцца з 4 тысяч рублёў. Акрамя гэтага, пераможца абавязваецца кампенсаваць садаводчаму таварыству 160 рублёў за правядзенне інжынернай інфраструктуры. Усяго ў кааператыве «Наш крыніца плюс» 202 надзелы прыкладна па 8 сотак. Амаль 15 сем'яў жывуць тут цэлы год. Неўзабаве дачны пасёлак можа быць пераведзены ў разрад населеных пунктаў, работа ў гэтым накірунку вядзецца.

Падобны ў напоўненасці вадой надзел прадаюць у таварыстве «Таксіст».