Брытанскі блогер паказаў, як сабраў для Top Gear машыну Джэймса Бонда

Ён нават убудаваў у яе агнямёт.

Брытанскі блогер і сталы госць Top Gear Колін Ферз пабудаваў для шоу амаль сапраўдную машыну Джэймса Бонда. У ёй ён паспрабаваў паўтарыць усё тое, што паказвалі ў фільмах пра галоўнага брытанскага шпіёна, піша «Медуза».

Паводле ўмоваў эксперыменту, машына Бонда ад Коліна Ферза павінна была быць дастаткова бюджэтнай – на яе можна было выдаткаваць не больш за сем тысячаў фунтаў. За аснову блогер узяў BMW Z3 (гэты аўтамабіль з'яўляўся ў бандыяне ў сярэдзіне 1990-х). У яго брытанец дадаў спецыяльнае дадатковае кола, якое можа прыўздымаць і паварочваць аўтамабіль – у фільмах Бонд выкарыстаў яго для прыцэльвання падчас язды.

Таксама Ферз умантаваў у падкрылкі распырсквальнік машыннага алею, убудаваў зброю ў задні бампер і дадаў жартоўную «камуфляжную сістэму» – дымавая машына працуе проста ў салоне і цалкам хавае кіроўцу ад пабочных. Адзіны мінус гэтай сістэмы маскавання – кіроўца сам таксама амаль нічога не ўбачыць і з цяжкасцю можа кіраваць машынай.

Але галоўнае – агнямёт у дне аўтамабіля! У відэа, дзе Ферз прэзентаваў свой «эпічны аўтамабіль Бонда, зроблены ў хатніх умовах», блогер нават пасмажыў з дапамогай агнямётаў сабе курыцу. Праўда, ужо засмажаную курыцу Ферз паказаў пасля перабіўкі – магчыма, на самай справе блогер зрабіў і не як Джэймс Бонд і набыў яе ў найбліжэйшым супермаркеце.