У Менску заўважылі самалёт Wizz Air
1- 11.04.2021, 17:55
- 23,264
Што робіць у сталіцы лаўкост?
Сёння ў Нацыянальным аэрапорце Менск прызямліўся самалёт вугорскага авіяперавозчыка Wizz Air, які ўжо не першы год заяўляе пра планы запуску рэгулярных авіязлучэнняў з Беларуссю. Tut.by даведаўся, чаму лаўкост апынуўся пад Менскам і ці значыць гэта, што папулярная авіякампанія з бюджэтнымі квіткамі нарэшце прыйшла на беларускі рынак.
Судна кампаніі Wizz Air рэйса «Будапешт - Менск» прызямлілася ў Нацыянальным аэрапорце Менск 11 красавіка а 12.58. Інфармацыя пра гэта з'явілася ў анлайн-сэрвісе FlightRadar24, які дазваляе адсочваць становішча паветраных суднаў (вось скрыншот).
Па падрабязнасці журналісты звярнуліся да прэс-сакратаркі Нацыянальнага аэрапорта Менск Раміны Саматханавай. Суразмоўніца паведаміла, што «нічога асаблівага» ў гэтай сітуацыі няма:
- Гэта быў чартарны рэйс, які даставіў у Менск футбалістаў з Будапешта. Тут казаць пра [пачатак] рэгулярных злучэнняў нельга. Звычайны заказны чартарны рэйс.
Удакладнім, што 13 красавіка ў сталіцы пройдзе адборачны матч чэмпіянату Еўропы ў міні-футболе Беларусь - Вугоршчына.
Пра тое, што ў Менск будзе лётаць вугорскі лаўкост Wizz Air, яшчэ у 2019 годзе журналістам распавядаў дырэктар Дэпартамента авіяцыі Міністэрства транспарту і камунікацый Беларусі Арцём Сікорскі. Планавалася, што авіязлучэнні стартуюць ужо вясной 2020 года. Праходзіла інфармацыя, што рэйсы будуць арганізаваны з аэрапорта ў Горадні, пазней - і ў Менску. Аднак рэгулярных палётаў Wizz Air з Беларусі па-ранейшаму няма, вядуцца перамовы.