Тры кіты і вялікая чарапаха: што чакае амерыканскую валюту і рубель

Прагноз фінансавага кансультанта.

На якую валюту рабіць стаўку сёння ў гэтым такім зменлівым, або валацільным, валютным свеце? «Рабі што хочаш - усё адно пашкадуеш», - казаў мудрэц, праўда, з іншай нагоды. Каб не пашкадаваць аб бязмэтна страчаных сродках, спытаем у экспэрта: ці рэальна, што даляр і рубель могуць сысці на самае дно, і калі так, хто будзе першым? І чаго найбліжэйшым часам чакаць на валютным рынку? Ці надасць падтрымку валюце кошт нафты, якой прадказваюць рост да 70 даляраў за барэль да канца года?

У каментары myfin.by фінансавы кансультант Міхаіл Грачоў выказаў свой пункт гледжання аб сітуацыі на валютным рынку.

«Мора хвалюецца раз…»

- На Міжнародным валютным рынку змены магчымыя. З большай доляй імавернасці можа адбыцца так, што цягам найбліжэйшых двух-трох месяцаў і ў перспектыве да канца года даляр ЗША будзе зніжацца ў дачыненні да асноўных валют. Сапраўды гэтак жа, як у нас у Беларусі, ёсць валютны кошык Нацыянальнага банка, на сусветным рынку адсочваюцца змены даляра ў валютным кошыку, асноўную долю ў якім займае еўра (яго доля блізу 60%, астатнія адсоткі дзеляць брытанскі фунт, японская ена, канадскі даляр і іншыя валюты). Зніжэнне індэкса даляра да гэтага кошыку вельмі магчымае.

Прычына ў тым, што зацверджаная першая праграма дапамогі эканоміцы ЗША ў суме 1,8 трлн даляраў. Яна ўжо пачала дзейнічаць у сярэдзіне сакавіка. На коне цяпер стаіць новая, абвешчаная прэзідэнтам Байдэнам, праграма падтрымкі эканомікі Злучаных Штатаў, якая ўключае 4 падпраграмы. Калі ў першым выпадку ўсё ў фінансаванні было зразумела, то з другой праграмай, разлічанай на 3-4 трлн даляраў, ёсць пытанні. Справа ў тым, што на рэалізацыю гэтай праграмы Байдэн плануе выкарыстаць грошы ад падвышэння падаткаў на буйныя карпарацыі, чаго апошнія катэгарычна не прымаюць. Таму далёка не факт, што гэтая праграма будзе прынятая.

Але пры гэтым нават тых фінансавых фундаванняў, якія ўжо зробленыя, дастаткова для таго, каб эканоміка ЗША пачала разагравацца. Цяпер там паспяхова ідзе вакцынацыя. Ёсць прагнозы аб росце эканомікі да канца года блізу 6-7%. Ці рэальна гэта - мы ўбачым увосень.

Гэты фактар фінансавых уліванняў будзе ціснуць на даляр ЗША. Ёсць імавернасць, што будзе расці фондавы рынак. Дарэчы, на мінулым тыдні індэкс Доў-Джонса абнавіў гістарычны максімум.

Тры кіты і вялікая чарапаха

Але ўсе гэтыя фактары ніякім чынам не адаб'юцца на пакупніцкай здольнасці даляра - гэта раз, на яго ліквіднасці — два, і на запатрабаванасці даляра ЗША як сусветнай рэзервовай валюты — тры.

Вось гэта тыя тры кіты ці тры сланы, на якіх знаходзіцца вялікая чарапаха амерыканскай эканомікі. І вось гэтыя тры кіты нікуды не падзенуцца - гэта факт. Даляр быў, ёсць і будзе. І калі будзе мяняцца яго курс, то гэта не адаб'ецца на здароўі самога даляра. Таму спісваць яго з рахункаў не тое каб заўчасна, але наогул не рацыянальна.

«І карабель плыве»

Што тычыцца расейскага рубля, то ён вядзе сябе дакладна так жа, як валюты развіваных рынкаў. Ён досыць валацільны і схільны да пэўных фактараў рызыкі, перш за ўсё такіх, як кошты энэрганосьбітаў, якія падтрымліваюць яго на плыву і трымаюць курс. Мы бачым, што на гэтым тыдні кошт нафты маркі Brent ўмацаваўся вышэй за 63 даляры за барэль. Ён перыядычна зніжаўся, але паспяхова адкарэктаваўся. Кошт нафты цяпер цалкам камфортна сябе адчувае. І імавернасць таго, што кошт нафты падымецца да канца года да 70 даляраў і замацуецца там, дастаткова высокая, бо гэта будзе звязанае з разаграваннем сусветнай эканомікі. Яго чакаюць пасля таго, як чалавецтва нарэшце справіцца з пандэміяй каранавіруса.

А другі фактар, які можа пацягнуць рубель у адваротны бок - гэта санкцыйны ціск з боку ЗША і іншых заходніх краін. Гэта ўжо прывяло да таго, што апошнія тыдні быў прыкметны выхад нерэзідэнтаў РФ з аблігацый федэральнай пазыкі.

Але ў той жа час АФП карыстаюцца актыўным попытам у самой Расеі і фондавы рынак РФ расце вельмі добра. За 2020 год колькасць фізічных асоб, карыстальнікаў так званых індывідуальных інвестыцыйных рахункаў (ІІС), значна вырасла і на 2021 год прагназуюць далейшы рост. З гэтага пункту гледжання, расейскаму рублю мала што пагражае.

Таму будзем назіраць за зменамі коштаў энэрганосьбітаў і даляра.

Калі казаць агулам, змены курсаў валют не цягнуць за сабой змяненняў пакупніцкай здольнасці валют, у тым ліку расейскага рубля. Усё ж пры ўсякіх абставінах расейская эканоміка самадастатковая. Ёсць, вядома, палітычныя рызыкі і шокі, але для таго і існуюць урады і фінансавыя інстытуты, каб правільна на іх рэагаваць.