Суд паводле справы Віктара Бабарыкі зноў перанеслі на нявызначаны тэрмін
10- 9.03.2021, 11:43
- 3,828
Пасяджэнняў 9 і 10 сакавіка не будзе.
Пасяджэнняў суда паводле справы палітвязня Віктара Бабарыкі, якія былі прызначаныя на 9 і 10 сакавіка, не будзе. Пра гэта tut.by паведаміў адвакат экс-прэтэндэнта ў прэзідэнты Дзмітрый Лаеўскі.
Нагадаем, 23 лютага стала вядома, што ў судзе паводле справы Віктара Бабарыкі і топ-мэнэджараў Белгазпрамбанка быў абвешчаны перапынак як мінімум да 9 сакавіка. Паводле інфармацыі tut.by, пасяджэнні адкладзеныя на такі тэрмін праз хваробу аднаго з удзельнікаў працэсу.
Але і 9 сакавіка пасяджэнне суда не адбудзецца.
- Перад выходнымі нам сакратарка суддзі сказала, што 9 і 10 не будзе пасяджэнняў, дадатковай інфармацыі мы не маем, - сказаў Лаеўскі.
Нагадаем, працэс паводле справы Віктара Бабарыкі, які мог стаць галоўным апанентам Аляксандра Лукашэнкі на прэзідэнцкіх выбарах у жніўні мінулага года, пачаўся 17 лютага. Справу разглядае Вярхоўны суд у будынку суду Маскоўскага раёна.