Максім Недасекаў здабыў золата ў скачках у вышыню з рэкордам Беларусі

Ранейшы рэкорд Беларусі таксама належаў Недасекаву.

Беларускі лёгкаатлет Максім Недасекаў здабыў золата чэмпіянату Еўропы-2021 у памяшканнях у скачках у вышыню, паведамляе pressball.by.

Недасекаў усталяваў рэкорд Беларусі ў залах і паказаў найлепшы вынік сезона ў свеце, узяўшы вышыню 2.37. Цікава, што Максім двойчы не пакарыў планку на вышыні 2.35, якую ўзяў яго асноўны канкурэнт Джанмарка Тамберы, а затым перанёс апошнюю спробу на 2.37, якая аказалася ўдалай.

Тамберы 2.37 узяць не здолеў і застаўся са срэбрам. Бельгіец Томас Кармой стаў бронзавым прызёрам з вынікам 2.26.

Ранейшы рэкорд Беларусі таксама належаў Недасекаву - 2.34. Ужо ў рангу чэмпіёна Еўропы ён штурмаваў вышыню 2.40, аднак тры спробы былі няўдалымі.

ЧЕ-2021 у памяшканнях. Скачкі ў вышыню, мужчыны

1. Максім Недасекаў (Беларусь) 2.37 NR WL

2. Джанмарка Тамберы (Італія) 2.35

3. Томас Кармой (Бэльгія) 2.26