Як беларусам хутка і танна зняць аўто з уліку

Гэта дасць магчымасць не плаціць транспартны падатак.

Транспартны падатак, які ўвялі ў Беларусі з 1 студзеня 2021, закрануў і пытанне зняцця з уліку аўтахламу. Справа ў тым, што ўладальнікам старых аўто, якія не эксплуатуюцца, дадзенае права да 1 ліпеня 2021 года зняць іх з уліку ў ДАІ ў спрошчаным рэжыме і тым самым пазбегнуць выплаты транспартнага падатку за 2021 год, піша kp.by.

- З 1 сакавіка 2021 года транспартны сродак можна зняць з уліку ў Дзяржаўтаінспекцыі паводле заяўнага прынцыпу, - адзначыў першы намеснік начальніка галоўнай управы ДАІ Міністэрства ўнутраных спраў Беларусі Вадзім Гаркун. - Уладальнік аўтамабіля, які ўжо страціў свае ўласцівасці, і для якога ў гаспадара з нейкіх прычын адсутнічаюць дакументы або рэгістрацыйныя знакі, можа звярнуцца з заявай у рэгістрацыйнае падраздзяленне Дзяржаўтаінспекцыі. Мы са свайго боку праводзім праверку, якая павінна ўстанавіць, ці эксплуатаваўся, удзельнічаў гэты аўтамабіль у дарожным руху цягам апошніх трох гадоў ці не.

Для гэтага, кажа Вадзім Гаркун, будуць задзейнічаныя ўсе магчымыя інфармацыйныя рэсурсы.

- Калі высвятляецца, што не ўдзельнічаў, то аўтамабіль будзе зняты з уліку на заяву ўладальніка без падачы дадатковых дакументаў. За дзень у Беларусі прыкладна адна тысяча аўтамабіляў, у тым ліку і паводле спрошчанай сістэмы, цяпер здымаецца з рэгістрацыйнага ўліку ў сувязі з утылізацыяй».

На пытанне, чаму ўладальнікі старых аўто не спрабавалі ад іх пазбавіцца раней, Гаркун адказаў наступнае:

- Магу выказаць сваё суб'ектыўнае меркаванне. Мяркую, што не было фактара прымусу, нормы, якая б абавязвала ўладальніка аўто здымаць яго з рэгістрацыйнага ўліку. З чыста практычнага пункту гледжання, там, дзе ўтылізуюць машыну, уладальніку кампенсуюць кошт металу, таму выдаткі дастаўкі на ўтылізацыю транспартнага сродку практычна кампенсуюцца гэтай выплатай.

Другі фактар - менталітэт нашых людзей не дайшоў да таго, што ўладанне транспартным сродкам - гэта пэўная адказнасць. Згодна з нашым заканадаўствам, грамадзянскім у тым ліку, у выпадку ўчынення ДТЗ з удзелам транспартнага сродку, яго ўласнік можа несці адказнасць у судзе. Пра гэта рэдка ўспамінаюць. Ды і «лісты шчасця», напрыклад, за перавышэнне хуткасці прыходзяць да ўласніка транспартнага сродку.

У найбліжэйшай перспектыве мы будзем фіксаваць у аўтаматычным рэжыме і праезд на чырвоны сігнал святлафора, і рух па паласе грамадскага транспарту, і парушэнне правілаў манеўравання. Таму думаю, што адказнасць уласнікаў транспартных сродкаў і разуменне гэтай адказнасці зменіцца.