Калона аўто «ябацек» не прапусціла хуткую дапамогу

Відэафакт.

Адзін з чытачоў даслаў Onliner відэа, на якое, з ягоных слоў, трапіў эпізод з удзелам аўтамабіля хуткай дапамогі з уключанымі святлівымі маякамі сіняга колеру і аўтамабілямі з «дзяржсімволікай, якія рухаліся калонай», гэта значыць, «ябацек».

Аўтар відэа распавёў, што інцыдэнт адбыўся 27 сакавіка (у суботу) блізу 17:00 у сталічным мікрараёне Сухарава.

- Калона не прапусціла «хуткую», - адзначыў наш чытач. - Ехалі вуліцай Гарэцкага недалёка ад АЗС «Беларуснафта».

«Хуткая», гэтак жа як і аўтамабілі з дзяржсімволікай, рухалася вуліцай Максіма Гарэцкага з боку вуліцы Шаранговіча ў накірунку вуліцы Янкоўскага. На гэтым адцінку вуліца Гарэцкага мае па дзве паласы руху ў кожны бок, паблізу скрыжавання з вуліцай Янкоўскага праезная частка пашыраецца да трох палос у кожны бок. Сітуацыю ўскладняла тое, што ўсцяж правага краю праезнай часткі на вуліцы былі прыпаркаваныя аўто. У выніку аўтамабіль хуткай дапамогі выехаў на паласу сустрэчнага руху для таго, каб аб'ехаць аўто, якія рухаліся адна за адной.

- Можна было зрушыцца направа, я мяркую, - адзначыў аўтар відэа.

Паводле ПДР (п.25) кіроўцы транспартных сродкаў аператыўнага прызначэння пры ўмове гарантавання бяспекі дарожнага руху могуць адступаць: з уключанымі маячкамі сіняга або сіняга і чырвонага колераў ад патрабаванняў святлафораў, дарожных знакаў і дарожнай разметкі, а таксама ад патрабавання шэрагу падпунктаў Правілаў.

П. 26 Правілаў дарожнага руху вызначае: «Пры набліжэнні транспартнага сродку аператыўнага прызначэння з уключаным маяком сіняга колеру кіроўцы незалежна ад накірунку іх руху павінны саступіць дарогу і забяспечыць бесперашкодны праезд паказанаму транспартнаму сродку аператыўнага прызначэння».

Саступіць дарогу ў гэтым выпадку азначае «не аднаўляць рух, знізіць хуткасць руху аж да спынення транспартнага сродку ці не ажыццяўляць які-небудзь манеўр (за выключэннем патрабавання вызваліць занятую паласу руху, якая падаецца рэгуліроўшчыкам або кіроўцам транспартнага сродку аператыўнага прызначэння), калі гэта можа прымусіць іншага ўдзельніка (іншых удзельнікаў) дарожнага руху змяніць кірунак і (або) хуткасць руху» (п.2.76 ПДР).