Бэнксі за £14 млн прадаў сваю працу, прысвечаную лекарам

Грошы пойдуць на патрэбы медыцыны.

Карціна брытанскага вулічнага мастака Бэнксі, прысвечаная пандэміі каранавіруса і лекарам, што з ёй змагаюцца, сышла з аўкцыёну за £14,4 млн. Пра гэта паведамляе BBC.

На аўкцыён была выстаўлена праца пад назвай Game Changer («Пераломны момант», або «Змена правілаў гульні»). У траўні летась яна з'явілася ў бальніцы ў Саўтгемптане, графства Гэмпшыр.

Праца ўяўляе сабой выяву дзіцяці, якое гуляе лялькай медсястры, прадстаўленай у абліччы супергероя. У той жа час іншыя лялькі супергерояў - Бэтмена і Чалавека-павука - ляжаць у сметніцы.

Аўкцыённы дом Christie's заявіў, што цана, заплачаная за працу, стала «сусветным аўкцыённым рэкордам» для Бэнксі. Раней самай дарагой карцінай мастака быў «Перададзены парламент», за яго Бэнксі атрымаў £9,9 млн.

Атрыманыя за карціну грошы пойдуць Дзяржаўнай службе здароўя Вялікабрытаніі.

Бэнксі - брытанскі андэрграўндны мастак стрыт-арта і палітычны актывіст. Яго сапраўднае імя невядомае, а вакол яго біяграфіі вядзецца шмат спрэчак.